Odinaxon Muhammad Sodiq: Otinoyilar uchun qo‘llanmalar (6 ta kitob)

Bu qo‘llanmalardan maqsad – Islom dinimizning asl taʼlimotlarini, Qurʼon va Sunnatni o‘rganib, amal qilish, jamiyatimizda, xususan ayollar orasida diniy savodxonlikni oshirish, ixtilof va firqachilikka barham berish, mutaassiblik va bidʼat-xurofotlarni yo‘qotishdir.

Ming afsuslar bo‘lsinki, musulmon xalqlar mustabid tuzum davrida dinidan, tarixidan, madaniyatidan, tilidan mahrum bo‘layozgan edi. Bu musibatlarning taʼsiri haligacha eʼtiqodimizda, ibodatlarimizda, kundalik hayotimizda baʼzan namoyon bo‘lib qolmoqda. Bu salbiy taʼsir sababli dinimizning tamal toshi bo‘lgan iymon-eʼtiqodimizda hosil bo‘lgan bo‘shliq har xil bidʼat-xurofotlar, irim-sirimlar bilan to‘lib qolgani hayotimizning har bir jabhasida bilinib qolmoqda. Kelajagimizning poydevori bo‘lgan yoshlar tarbiyasi, oila, nikoh masalalaridagi, to‘y va marosimlardagi muammolarimiz, iymon-ixlosimizdagi nuqsonlarimiz, namoz, zakot, ro‘za, haj va umra kabi ibodatlardagi kamchiliklarimiz aynan diniy savodsizlikning oqibatidir. Ushbu muammolarni bartaraf qilishning yagona va eng to‘g‘ri yechimi – ilm olish va unga amal qilish, olingan bilimlarni avvalo oilamizda, so‘ngra esa mahallada, jamiyatda targ‘ib qilib, ilm-maʼrifat tarqatishdir. Bunda esa ilmli, diyonatli oinoyilarimizning o‘rni beqiyos.

Qo‘llanmamizning birinchi bosqichida aqiyda, Qurʼon, hadis, siyrat ilmlari bo‘yicha eng kerakli maʼlumotlar berilgan. Shuningdek, janoza namozi va dafn marosimlari bilan bog‘liq muhim masalalar ham yoritilib, bu borada urf bo‘lib ketgan bidʼat-xurofotlarning asl mohiyati ochib berilgan.

Qo‘llanmalarning ikkinchi bosqichi ham nashrdan chiqish arafasida. Ikkinchi bosqich qo‘llanmalari ham birinchi bosqichdagi har bir qo‘llanmaning uzviy davomi bo‘lib, ulardagi uslubni davom ettirgan holda yana ko‘plab maʼlumotlarni o‘z ichiga oladi.