Xorxe Munis: Medkomiks — tibbiyotni o'rganishning qiziqarli usuli

Tibbiyotni o‘rganish uzoq muddatli, shu bilan birgalikda qiziqarli bir sayohat kabidir. U insondan yuqori darajali bilim va masʼuliyat talab etadi. Ushbu kitob bilim olish yo‘lidagi sayohatingizda sizni oldinga harakatlanishingizga yordam beruvchi material bo‘lib xizmat qiladi. Avvaldan maʼlumki, tibbiyot taʼlimida qo‘llanilayotgan eski usullar kishida zerikish, taʼsirlanish kabi manfiy hissiyotlarni keltirib chiqaradi. O‘quvchilar faqat gaplardan iborat katta kitoblardan, oxiri ko‘rinmaydigan taqdimotlardan foydalanish asnosida, yangi uslubdagi o‘quv materiallarini yaratishga ehtiyoj ortib borayotganini tushungan bo‘lsalar ajab emas.

Eski o‘qitish uslublari ko‘p yillar davomida qo‘llanilib kelayotgani, bu uslublarning qaysidir tomonlama samarali ekanligini butunlay inkor etib bo‘lmasligidan dalolat beradi. Ammo bu borada yetarlicha muammolar borligi hech kimga sir emas. Ushbu muammolardan kelib chiqqan holda biz o‘zimizga quyidagi savollarni berib ko‘rdik:

Tibbiyot taʼlimini yana-da qiziqarliroq, zavq beruvchi va o‘quvchini zeriktirmaydigan darajaga keltira olamizmi?

O‘quv jarayonlarini og‘ir yuk sifatida, qo‘rquv sifatida emas, balki barcha intiladigan, qatnashishni xohlaydigan mashg‘ulot "hobby" darajasiga yetkaza oladigan o‘quv muhitini yarata olamizmi?

Yuqoridagi savollarga javob topish uchun biz taʼlimni o‘quvchining majburiyati emas, balki uning sevimli mashg‘ulotiga aylantirishimiz lozim edi. Ayni shu yo‘lda Medkomiks kitobi yorug‘ nur o‘laroq, tibbiyot taʼlimotida chaqnash sodir etdi desak mubolag‘a bo‘lmaydi.

Professorlar katta maʼruza zallarida nutq so‘zlayotgan vaqtda tinglovchilarning baʼzilari ijtimoiy tarmoqlar, baʼzilari esa uxlash bilan band bo‘lishadi. Bunday hollarda professorlarga tinglovchilarni eʼtiborini o‘ziga jalb etuvchi uslublar, materiallar kerak bo‘ladi. Professorlar tomonidan beriladigan materiallarda vizual illyustratsiyalarning kamligi ularda o‘quvchilarning diqqatini qaratishda va ularga ko‘proq maʼlumotlarni yetkazib berishda qiyinchiliklarni yuzaga keltiradi. Qiziqarli tomoni shundaki, Medkomiks kitobi dunyoning bir qancha mamlakatlarida professorlar tomonidan muvaffaqiyatli qo‘llanib kelinmoqda va zamonaviy taʼlim materiallari qatoridan joy olgan.

Ushbu kitob sizning taʼlim olishingizda qo‘shimcha material sifatida xizmat qiladi. Kitob eng ko‘p uchrovchi va eslab qolish qiyin bo‘lgan kasalliklar haqida yuqori sifatli illyustrativ va kreativ rasmlar bilan boyitilgan.

Medkomiks kitobining vazifasi multfilm yo‘nalishini tibbiyot sohasiga targ‘ib qilish va shu orqali taʼlimni oson, qiziqarli va zavqli jarayonga aylantirishdan iborat. Kitobda berilgan illyustratsiyalar sizning ilm narvonidan ko‘tarilishingizda va muvaffaqiyatlarga erishishingizda bir dastak bo‘lib xizmat qiladi degan umiddamiz.