Firuz Allayev: Tadbirkor

"Tadbirkor" - "Asaxiy" internet-do‘koni asoschisi Firuz Allayevning sakkiz yillik real tajribasi mahsulidir. Bu asar orqali muallif atigi 400 dollar bilan boshlangan kichik loyihaning qanday qilib butun O‘zbekiston bo‘ylab tanilgan, ko‘lamdor biznesga aylangani haqida ochiq va samimiy hikoya qiladi.

Kitobda biznesning ortida turgan hayotiy tajriba: yo‘l-yo‘lakay uchragan xatolar, muvaffaqiyatlar, omad, ba’zan esa shunchaki sabr va qat’iyat talab qilgan sinovlar ortiqcha bezaklarsiz, boricha yozilgan. Kitobda muallif chet el tajribalarini emas, balki O‘zbekiston sharoitida sinovdan o‘tgan usullarni va taniqli tadbirkorlarning hayotiy misollarini oddiy tilda tushuntiradi.
 

Kitob uch bo‘limdan iborat:

1-bo‘lim: Tadbirkorlikni qanday tushunamiz?

Birinchi bo‘limda sohaga nazariy yondashilgan, ta’rif berilgan. Tadbirkorlik, uning davlat, iqtisod va jamiyatga foydasi haqida mulohaza yuritilgan. Bo‘lim yakunida esa tadbirkorlik qanday qilib innovatsiyalarga turtki bo‘lishi tahlil qilingan.

2-bo‘lim: Tadbirkor va biznes

Kitobning ikkinchi bo‘limi biznesning tug‘ilishi va muvaffaqiyatga erishish yo‘llari haqidadir. Unda tajribamdan kelib chiqib, biznesda muvaffaqiyat uchun muhim bo‘lgan omillar haqida fikr bildirganman, misollar va aniq faktlar keltirganman. Shu asnoda tadbirkorda biznes g‘oyasi qayerdan paydo bo‘ladi, liderlik qanchalik muhim, g‘oya qanday amalga oshiriladi kabi savollarga javob izlaganman. Jamoani boshqarish, sotuv, marketing, moliya kabi muhim masalalarga ham to‘xtalganman.

3-bo‘lim: Tadbirkor menejer

Uchinchi bo‘limda asosiy urg‘u tadbirkorning menejerlik qobiliyatlariga qaratilgan bo‘lib, biznes boshqaruvi uchun muhim jihatlar qamrab olinadi. Biznesni boshlash boshqa, uni boshqarish boshqa. Biznesni boshlash kishidan tashabbuskorlik, ijodkorlik, topqirlik va g‘ayrat talab qilsa, uni boshqarish uchun ­ menejment ko‘nikmalarini egallash zarur. Menejment esa dunyoning eng yirik universitetlarida o‘qitiladigan butun boshli fandir. Bo‘limda tadbirkor muvaffaqiyatli menejerga aylanishi uchun zarur bo‘ladigan yetti ko‘nikma va u nima berishi haqida ham gaplashamiz

Kitob kimlar uchun mos keladi:

▪️ Biznes boshlamoqchi bo‘lgan yoki shu yo‘lda birinchi qadamni tashlayotganlar;

▪️ Allaqachon tadbirkorlik bilan shug‘ullanayotgan, ammo rivojlanish bosqichida turganlar;

▪️ Menejment, marketing, sotuv, jamoa boshqaruvi kabi yo‘nalishlarda chuqurroq bilim olishni istaganlar uchun mo‘ljallangan.
 

“Tadbirkor” kitobi nimasi bilan ajralib turadi:

▪️​​​​​​​ Real saboqlar: O‘zbek tadbirkorining real tajribasi va hayotiy saboqlari asosida yozilgan;

▪️​​​​​​​ Oddiy til: Til jihatidan sodda, samimiy va o‘qishga yengil, shu bilan birga mazmunan chuqur;

▪️​​​​​​​ Aniq misollar: Har bir sahifada quruq motivatsiya emas, balki aniq tajriba va hayotiy misol bor;

▪️​​​​​​​ ​​​​​​​Amaliy yondashuv: Biznesni qanday boshlash va boshqarish haqida an’anaviy nazariyadan farqli, amaliy yondashuvni taklif qiladi.

Muallif haqida:

Firuz Allayev - "Asaxiy" internet-do‘koni va "Asaxiy Books" loyihalarining asoschisi. O‘zbekistonda tadbirkorlik rivojiga qo‘shgan hissasi uchun “Shuhrat” medali va "Tahsin" mukofoti bilan taqdirlangan. "Tadbirkor" kitobi orqali muallif o‘z yo‘lini, o‘rgangan saboqlarini va o‘zbek biznesi haqidagi mulohazalarini kitobxon bilan bo‘lishadi.