Fahriddin Hayit: Tong tushlari

Har bir insonning barmog‘idagi chiziqlar o‘ziga xos bo‘lib, bir-biriga o‘xshashi uchramas ekan. Dunyoda shoirlar ham ko‘p, sevib o‘qiydigan, dilda takrorlab yuradigan sheʼrlar ham talaygina. Ular bir-biridan ayro ko‘ngillarga nur kabi iliqlik olib kiradi. halovat, taskin baxsh etadi. Har bir shoirning o‘z salohiyati, o‘z mavzusi, o‘z uslubi bor. Shu bois, so‘z turfa ranglarda jilolanib, uning jozibasi qalblarni mavjlantirib turadi. Sheʼrni o‘qigan sayin o‘qiging kelaveradi.

Faxriddin Hayitning "Tong tushlari" nomli yangi to‘plamidan joy olgan sheʼrlarida inson olamining turfa timsolini ruhan anglagandek bo‘lasiz. Goh jo‘shqin, goh hazin, goh isyonli, goh sokin hissiyotlar bilan qalb manzillariga yetasiz. Manzaralar, go‘zal tashbehlar, sevgi va sog‘inch, Vatan va tasavvur, maʼno va ruhiyat, hayot va erk, halovat va iztirob kabi ko‘ngil kechinmalari misralarda o‘z aksini topgan.

Har bir sheʼrda shoir o‘z qarashlarini, o‘zi topgan yechim va xulosalarini to‘la-to‘kis berishga intilgan. O‘zi anglagan dunyoni ko‘rsatib bera olgan. O‘ylaymizki, ijodkorning sheʼrlari Siz aziz o‘quvchining ko‘ngil mulkingizga aylanadi.