Bilimdon. Oila va do'stlar davrasida o'ynang!

Siz intellektual o‘yinlarning ishqibozimisiz? Undan cheksiz adrenalin olasizmi? Bu hissiyotlarni oʻz yaqinlaringiz bilan boʻlishishga nima deysiz?

Endilikda turli nomlar ostida ommalashgan intellektual oʻyinni oʻz uyingizda yoki doʻstlar davrasida oʻynash imkoniyati SIZda bor. “Bilimdon” mana shunday muhitni taqdim etadi!

O‘yin talabi. Ishtirokchilar 3-7 kishidan iborat bo‘ladi. Savollar 12 yoshdan katta havaskor bilimdonlar uchun mo‘ljallangan.

O‘yin maydoni. Markazga o‘yin g‘ildiragi (baraban) o‘rnatiladi, uning atrofida savol kartochkalari qo‘yiladigan 12 ta sektor joylashadi.

Savol kartochkalari. Ularning yuzasida savol matni va uning raqami ko‘rsatilgan bo‘ladi.

Javoblar va qoidalar kitobchasi. Unda o‘yinning barcha qoidalari batafsil tushuntirilgan bo‘lib, savollar javobi ham keltirilgan.

O‘yin tartibi. O‘yinchilar birinchi navbatda boshlovchi kim bo‘lishini kelishib olishi lozim. Boshlovchi barcha savol kartochkalaridan 12 tasini tanlab olib, o‘yin maydonidagi sektorlarga terib chiqadi. Bunda savol matni yopiq holda, “Bilimdon” yozuvi esa tepada bo‘lishi kerak. O‘yin boshlanishidan oldin bilimdonlar jamoasi o‘ziga SARDOR tanlaydi.

Qoidalar kitobchasi o‘yin vaqtida boshlovchida bo‘lishi zarur. Bilimdonlar javoblarni ko‘rmagan bo‘lishi shart.

Boshlovchi yoki bilimdonlardan biri g‘ildirakni soat strelkasi yo‘nalishi bo‘yicha aylantiradi va o‘yin boshlanadi.

G‘ildirak (baraban). Maxsus karton g‘ildirak strelka bilan jihozlangan bo‘lib, o‘yin maydonining o‘rtasiga o‘rnatiladi. Strelkani aylantirish orqali qaysi sektordagi savol o‘ynalishi aniqlanadi.

Аgar strelka savol o‘ynab bo‘lingan bo‘sh sektorga tushsa, u holda boshlovchi soat strelkasi bo‘yicha keyingi savol kartochkasini oladi.

Hisob tablosi. Taqvim ko‘rinishidagi tablo orqali bilimdonlar va boshlovchining olgan ochkolari hisoblab boriladi. Chap tomondagi raqamlar bilimdonlar topgan savollar sonini, o‘ng tomondagi raqamlar esa topilmagan savollar sonini ko‘rsatadi.

O‘yin maqsadi. Bilimdonlar jamoasining maqsadi savollarga javob topib, 6 ochko to‘plashdan iborat. Har bir to‘g‘ri javob uchun bilimdonlar 1 ochko oladi. Har bir noto‘g‘ri javob uchun 1 ochko boshlovchiga beriladi. Аgar boshlovchi 6 ochko to‘plasa, bilimdonlar jamoasi yutqazadi.

Savol shakllari. Savollar turli xil ko‘rinishda bo‘lib, haqiqiy intellektual o‘yin muhitini his qilishga yordam beradi.

Kartochkalarning 50 tasida matnning o‘rniga video-savollar QR-kodi tushirilgan. Uni ko‘rish uchun “Bilimdon” mobil ilovasidagi “Video-savol” bo‘limiga kirish va telefon kamerasini QR-kod tushirilgan kartochkaga yo‘naltirish zarur.

Savolning javobi mobil ilovadagi “Javoblar” bo‘limidan topiladi.

“Bilimdon” mobil ilovasini Play Market va AppStore orqali yuklab olishingiz mumkin.