“Asaxiy Books” nashriyoti 5 yildan ortiq vaqtdan beri turli xalqlar adabiyoti bilan o‘zbek kitobxonlarini tanishtirib kelmoqda. Nashriyotning asosiy maqsadi jahon adabiyotidagi asarlarni o‘zbek tiliga tarjima qilib, O‘zbekistondagi savodxonlikni oshirishdan iborat. “Asaxiy Books” hozirgacha badiiy adabiyot namunalarini, biografiya, biznes, psixologiya kabi janrlardagi ko‘plab kitoblarni o‘zbek tiliga o‘girib chop etgan hamda yuqori sifatli kitoblari bilan o‘zbek kitobxonlari orasida tanilgan.

“Xalq Banki” va “Asaxiy Books” hamkorligi

Moliyaviy resurslarning yetarli emasligi ushbu nashriyot faoliyati uchun jiddiy to‘siq bo‘ldi. Bir yarim asrdan buyon faoliyat yuritib kelayotgan “Xalq Banki” esa o‘zining yordami bilan bu to‘siqni oshib o‘tishga ko‘maklashdi.

Biz yoshlarning kitob o‘qishga bo‘lgan qiziqishini oshirishga, ularni kitob bilan do‘st bo‘lishiga, aholining kitobxonlik saviyasini yanada koʻtarishga o‘z hissamizni qo‘shish istagidamiz. — Xalq banki

“Xalq banki” xalqimizning rivojlanishiga, eng sara adabiyotlarni oʻz ona tilida mutolaa qilishiga hissa qo‘shishni maqsad qilgan. Shu uchun “Asaxiy Books” loyihasi bilan navbatdagi chop etiladigan 20 ta kitobga hamkorlik shartnomasi imzolandi. Bu loyihaning keyingi rivojlanish bosqichiga chiqishiga va oʻzbek tilida manfaatli kitoblar soni ortishiga sabab boʻladi, deb umid qilamiz.

Xulosa qilib aytganda, ushbu hamkorlik O‘zbekistondagi kitobxonlikni yangi darajaga olib chiqadi. Buning uchun, “Xalq banki”ga nafaqat “Asaxiy Books” loyihasi, balki barcha kitobsevarlar nomidan minnatdorchilik bildiramiz.