Ўзбекистон обидаларидаги битиклар Қашқадарё

Ушбу жилд Амир Темур ва Темурийлар маданиятининг Ренессанс даврига оид Шаҳрисабз меъморий ёдгорликларидаги битикларга бағишланган. Альбомга киритилган ёдгорликлар орасида Оқсарой, Даруссаодат ва Доруттиловат меъморий мажмуалари, Ҳазрати Малик Аждар ва Абдушукур Оғалиқ масжидларини учратиш мумкин. Ёдгорликлардаги ёзувларнинг аксарияти йўқолган ва ишчи гуруҳ томонидан эски фотосуратлар, ўтмиш илоҳиётшунослари ҳамда олимларининг архив ёзувлари, йўқолган хатлар излари, ганч асосида босилган мозаик паннолар асосида қайта тикланган. Тадқиқотлар натижасида ёдгорликлардаги деярли барча битиклар ўқиб чиқилган, биринчи марта етти устознинг номлари, шунингдек, матнларни тузувчилар (шоирлар, илоҳиётшунослар) исмлари аниқланган. Хусусан, Оқсаройда “Адолат — давлат асоси ва ҳукмдорлар шиори”, “Салтанатингизда (ўз) Сулаймон каби, ҳаётингизда (давомида) Нуҳ каби зукко бўлинг”, каби бир қатор сиёсий иборалар илк бора аниқланган.