Жеймс Фенимор Купер: Жосус ёхуд бетараф ўлка ҳикояти

Қўлингиздаги ушбу китоб АҚШда яшаб ижод этган адиб Жеймс Фенимор Купер (1789-1851) қаламига мансуб "The Spy: a Tale of the Neutral Ground" романининг рус тили орқали (инглиз тилидан рус тилига Э. А. Бер ва Й. М. Шишмаревойлар "Шпион, или Повесть о нейтральной территории" номи остида таржима қилишган) Эркин Миробидов томонидан "Жосус ёхуд бетараф ўлка ҳикояти" номи остида таржима қилинган кўринишидир.

Шуни билингки, бадиий асарни таржима қилиш (айниқса, туркий тилларга мансуб бўлмаган тилдан таржима қилиш) шу асарни қайтадан ёзиш билан тенг қийинчиликка эга. Шу тилдаги ибораларни сўзларни, жумлаларни ёки мақол-маталларни маромига етказиб таржима қилиш жуда мушкул иш ҳисобланади. Чунки бунда таржимондан бевосита энг камида иккита хорижий тилни мукаммал билиш, шунингдек, ўша тил эгалари - халқнинг турмуш тарзи, этнографиясини, маданиятини ва тарихини мукаммал билиш талаб этилади. Шунинг учун Эркин Миробидов ҳам доимо халқимизнинг, айниқса, ўқувчи ёшларимизнинг таҳсину ташаккурига сазовор бўлган. Биз ҳам шулар қаторида таржимон - Эркин Миробидовдан ушбу хизматлари учун беҳад хурсандмиз!

«Жосус ёхуд бетараф ўлка ҳикояти» асари - жаҳон адабиётининг ўлмас дурдоналаридан бири ҳисобланади! Бу асар нафақат бадиий китоб орқали, балки юртимиз телеканалларида берилган видеофильми орқали ҳам жуда машҳур.

Фенимор Купер ўз асарларида озодлик учун курашувчи мард, жасур қаҳрамонни улуғлайди. «Жосус» романининг қаҳрамони - ватани учун жонини фидо қилган Гарви Бёрч, чиндан ҳам, яшаган тарихий шахс. Романда америкаликларнинг инглиз мустамлакачиларига қарши курашининг драматик манзаралари юксак бадиий маҳорат билан тасвирланган.

Ушбу китоб илк бор ўзбек тилида 1979 йилда чоп этилган. Бу даврдаги нашрида айрим сўз ва жумлаларнинг маъноси изоҳланмаган ёки русча сўзлар, ёки байналмилал жумлалар орқали берилган эди. Бу ҳолат билан биз таржимонларни ёки ўша давр нашриёти ходимларини камситиш фикридан йироқмиз. Фақат ҳозирги давр китобхонларининг талаб ва илтимосларига асосан асар таржимасига қўшимча иқтибослар киритилди ва ҳозирги ўзбек адабий тили қоидалари асосида қайта таҳрирланди.