Abdulla Qodiriy: Tanlangan asarlar

"Abdulla Qodiriy. Tanlangan asarlar" kitobi taqdimoti

Albatta, Qodiriyning asarlari siz-u bizga begona emas. Ular bundan oldin ham chop etilgan, o‘qilgan, sevilgan. Ammo bugungi taqdimoti bo‘lgan saylanmaning o‘zgacha qiymati bor. Bu nashr – o‘tmishdan chiqib kelayotgan tanish ovozlarimizni yana bir bor tartibga solgan, yangicha ko‘rinishda birlashtirgan, vaqt sinovidan o‘tgan uch nodir asarni bitta kitobga jamlagan to‘plamdir. Go‘yo uchta alohida o‘zan bir daryoga quyilgandek.

Qodiriy merosi vaqt o‘tgan sari o‘zgarib qolmaydi, ammo uni ko‘rish nigohimiz o‘zgaradi. Bugungi nashr ana shu yangicha nigohni taqdim qiladi:

– Yangi tahrir,

– Yangi tartib,

– va eng muhimi – asarning o‘quvchi bilan suhbatini kuchaytiruvchi yangi ko‘rinish.

Kitobga razm solib shuni anglash mumkinki, nashrga tayyorlash jarayonida ijodiy jamoalar nafaqat matn bilan ishlagan, balki Qodiriy ruhiyatini zamonaviy odamga qanday yetkazish mumkin – degan katta savol ustida ham bosh qotirgani ko‘rinib turibdi. Shuning uchun bu nashr shunchaki qayta chop etilgan matnlar emas, balki o‘tmish va bugun o‘rtasidagi yangi ko‘prikdir.

Shu o‘rinda, ushbu hayrli ishga bosh qo‘shgan barchaga, jumladan, adibning maʼnaviy merosini bizlarga munosib tarzda taqdim qilayotgan oila aʼzolariga, kitobning masʼul muharriri Xondamir Qodiriyga, “Dunyo nashr” nashriyoti direktori – Feruza Quvonova hamda ijodiy jamoasiga, “Sarbon books” kitoblar do‘koni direktori Shahinabegim Olimovaga minnatdorchilik bildiraman.

Ularning har biri bu kitobga faqatgina mehnatini emas – o‘z eʼtiqodini, adabiyotga bo‘lgan muhabbatini qo‘shgan. Bunday saʼy-harakatlar jamiyatimizda maʼrifat urug‘ining sog‘lom ko‘karishini taʼminlaydi.

Bugungi taqdimot bizga shuni yana bir bor eslatdi: klassika hech qachon eskirmaydi, uni biz yangicha talqin qilsak – u yangidan yashaydi. Barchamizga ushbu kitob muborak bo‘lsin!