Обиддин Маҳмудов: Фарзанднома

Ахлоқ-одоб – мустаҳкам заминда вужудга келади, юксалади... Мустаҳкам замин, бу – донишманд бобо-момоларнинг кўп минг йиллик ахлоқий- руҳий, ҳаётий тажрибалари, маърифатли ота-оналарнинг мақбул тарбияси, мунаввар фикрли устозларнинг илму ҳикматга бой таълим-ўгитлари, заковат хазинаси бўлмиш азизу фозилларнинг улкан маънавий ибрати, адолат ва юртпарвар йўлбошчи, раҳбарларнинг самимий йўл-йўриқлари ҳамда саховатпеша зотларнинг кўрсатган холис ёрдамидир. Бундай соғлом муҳитда вояга етган ёш авлоднинг, турган гапки, одоби гўзал, билими чуқур, тафаккури юксак, мушоҳадаси кенг, масъулиятни теран ҳис этадиган, муҳими, жамият равнақига хизмат қиладиган комил инсон бўлиб шаклланади.

Ушбу китоб фарзанд тарбияси ва унинг камолоти учун бефарқ бўлмаган ота-оналарга, устоз мураббийларга, қолаверса, инсониятнинг маънавий юксалиши йўлида жон куйдираётган фидойи, заҳматкаш зиёлиларга мўлжалланган. У сиз ва зурриётларингиз севиб ўқийдиган асарга айланади, деб умид қиламиз.