Муҳаммад Зоҳид Қутқу: Охират қайғуси

Маълумки, барча мавжудотлар Аллоҳ таолонинг яратган маҳлуқларидир. Булардан баъзилари фаришталар каби гуноҳлардан фориғ бўлиб, фақатгина буюрилган ишларни бажарадилар, бошқа нарсаларни билмайдилар. Бошка бир қисми эса ҳайвонлар бўлиб, улар ақл ва заковатдан маҳрум бўлгани учун, шаҳватлари нимани истаса шуни бажарадилар. Гуноҳ, ҳаром билмайдилар, фақатгина шаҳватларига асирдирлар. Ҳақ ва адолатни билмайдилар, кучли ҳайвонлар кучсиз, заиф ҳайвонларга ташланади. Аллоҳ яратган яна бир қисм маҳлуқлар борки, у ҳам бўлса инсондир. Аллоҳ инсонларга ақл ва заковат бериб, уларни мукаммал қилиб яратган. Инсонларнинг баъзилари коинотнинг эгаси бўлмиш Аллоҳ таолога ва Унинг пайғамбарларига, китобларига, охиратга, яхшилик ва ёмонликнинг Аллоҳдан эканлигига иймон келтириб, охират азобидан қўрқади. Улар жаннатни истайдилар ва дўзахдан қўрқиб узоқлашадилар. Бошқа тур инсонлар ҳам борки, улар Аллоҳни танимайдилар, ҳар бир нарсани табиат яратган деб биладилар, охират кунидан қўрқмайдилар, мана шундай кишиларга "кофир" дейилади.

Дунёнинг эгаси Аллоҳдир, шу боис банданинг бирламчи вазифаси коинотнинг эгаси бўлмиш Аллоҳни танимоқ ва унга бандалик вазифасини адо этмоқдир. Бизнинг яратилишимиздан мақсад ҳам шу бўлиб, бошқа нарсалар Аллоҳни таниб ва унга ибодат қилишимизга василадир.