MehrNoz: Istisno

MehrNoz — “Istisno”

“Istisno” — shoira MehrNozning o‘n yillik ijod mahsulini jamlagan she’riy to‘plam. Kitob uch qismdan iborat bo‘lib, unda insonning turli yosh davrlari, iztiroblari, quvonchlari, orzulari va hayotga bergan savollari aks etadi.

“Simurg‘” deb nomlangan birinchi qismda 25–30 yosh oralig‘idagi ayolning hayotga, o‘ziga va ona bo‘lish baxtiga doir kechinmalari, savollari va iztiroblari ifodalanadi.

Ikkinchi qism “Qaqnus”  20–25 yoshdagi, katta hayotga endigina qadam qo‘ygan ayolning izlanishlari, yonib-kuyishlari va har safar o‘z kulidan qayta bunyod bo‘lishi haqida hikoya qiladi.

“Humo” deb nomlangan uchinchi qism esa 15–20 yoshdagi qizning beg‘ubor orzulari, shaffof xayollari va mo‘jizalarga bo‘lgan cheksiz ishonchini aks ettiradi.

“Istisno”ni o‘qir ekansiz, avvaliga muallifning ichki olamiga sayohat qilayotgandek bo‘lasiz. Ammo sahifalar davomida bu olam aslida sizning o‘zingizga qanchalik yaqin ekanini anglaysiz. Balki bu kitob siz uchun ham shovqinlardan bir muddat chekinib, o‘zingizni tinglashni istaydigan manzilga aylanar.