МеҳрНоз: Истисно

МеҳрНоз — “Истисно”
“Истисно” — шоира МеҳрНознинг ўн йиллик ижод маҳсулини жамлаган шеърий тўплам. Китоб уч қисмдан иборат бўлиб, унда инсоннинг турли ёш даврлари, изтироблари, қувончлари, орзулари ва ҳаётга берган саволлари акс этади.

“Симурғ” деб номланган биринчи қисмда 25–30 ёш оралиғидаги аёлнинг ҳаётга, ўзига ва она бўлиш бахтига доир кечинмалари, саволлари ва изтироблари ифодаланади.
Иккинчи қисм “Қақнус”  20–25 ёшдаги, катта ҳаётга эндигина қадам қўйган аёлнинг изланишлари, ёниб-куйишлари ва ҳар сафар ўз кулидан қайта бунёд бўлиши ҳақида ҳикоя қилади.

“Ҳумо” деб номланган учинчи қисм эса 15–20 ёшдаги қизнинг беғубор орзулари, шаффоф хаёллари ва мўжизаларга бўлган чексиз ишончини акс эттиради.

“Истисно”ни ўқир экансиз, аввалига муаллифнинг ички оламига саёҳат қилаётгандек бўласиз. Аммо саҳифалар давомида бу олам аслида сизнинг ўзингизга қанчалик яқин эканини англайсиз. Балки бу китоб сиз учун ҳам шовқинлардан бир муддат чекиниб, ўзингизни тинглашни истайдиган манзилга айланар.