Комил Синдаров: Ўғирланган болалик (Терговчи)

Ижтимоий тармоқлар орқали жиноятчилик, безорилик, айниқса, қотиллик содир этилгани тўғрисидаги совуқ хабарларни тинглар эканмиз, одамлар нега инсонийликни йўқотиб, қаҳри қаттиқлашиб бораётгани ҳақида ўйлаб қоламиз... Бир нарса аниқки, ҳаётда ҳеч ким онадан жиноятчи бўлиб туғилмайди.

Аксинча, бола вояга етар экан, оиладаги носоғлом муҳит, ота онанинг тарбия масъулиятини ҳис этмаслиги, эътиборсизлик ва лоқайдлик каби иллатлар унинг охир-оқибат жиноят кўчасига киришига сабаб бўлади. Комил Синдаров қаламига мансуб «Ўзбек детективи» рукнида нашр юзини кўрган янги асар - «Ўғирланган болалик» юқоридаги мулоҳазалар ҳақида сўзлайди.

Китобни варақлар экансиз, норасида гўдакларнинг сирли равишда йўқолиб қолиши, гумондорларнинг хатти-ҳаракати жиноят мотивига тасодифан мос келиши ва сизга яхши таниш бўлган прокуратура терговчиси Санжарбек ва ҳамкасбларининг усталик билан йўқотилган қотиллик излари ва далилларини моҳирлик билан фош этишдаги касбий маҳорати асарни бир нафасда ўқиб чиқишингизга хизмат қилади.