Ҳакан Менгюч: Қалбингиз соф бўлса, ҳикоянгиз бахтли якунланар

Ҳеч қандай учрашув тасодифий эмас. Худди ҳозир бу сатрларни ўқиётганингиз бежиз бўлмаганидек, Африкага борганим ва у ерда бир суфий билан учрашиб, ундан ўрганганларимни шу китобда жамлаганим ҳам бежиз эмас.

Суфийлар: "Дардлар инсонни олға интилишга ундайди", - дейдилар. Энг муҳими, олға интилишдан воз кечмасликдир. Бу эса йўлга чиққанлар учун "умид бор" деган маънони англатади. Чунки тақдир ҳар лаҳза қайта-қайта ёзилади. Сиз ким билан учрашишингизни ёки нима топишингизни ҳеч қачон била олмайсиз. Баъзида истаган нарсангизни қидириб ҳам топа олмайсиз, лекин кимки истаганини топган бўлса, демак, у излаган. Мавлоно айтганидек: "Йўлга чиқсанг, манзил кўринади".

Ушбу китобга йўлимда менга ҳамроҳлик қилган устозларимдан илҳомланиб суфий аҳлининг дардлардан қутулиш, ўзаро муносабатлардаги муаммоларини ҳал этиш, ҳаётга янада ижобий муносабатда бўлиш учун қўллаган амалий усулларини киритдим. Китобдаги насиҳат-у кўникмалар бугунги кунгача минглаб одамларга ёрдам берган ва сизга ҳам ёрдам беришига ишонаман.

Шуни эсдан чиқарманг, ҳамроҳим: неча ёшда бўлишингиздан, бошингиздан нималар кечирганингиздан қатъий назар, қалбингиз соф бўлса, ҳикоянгиз бахтли якунланади.

Турк тилидан Абдувосилова Муқаддас ва Эргашбой Матёқубов таржимаси