Фармон Тошев: Савр баёзи

Қамария тақвими бўйича Ойнинг ўн икки буржи ва йигирма саккизта манзили бор. Буржлар — ҳамал, савр, жавзо, саратон, асад, сунбула, мезон, ақраб, қавс, жадий, далв, ҳут. Ҳар бир буржда иккию учдан бир манзил бўлиб, ой ҳар кеча шу манзиллардан бирига тушиб ўтади. Агар ой 30 кун бўлса, икки кеча ой кўринмайди. 29 кун бўлса, бир кеча кўринмайди. Қуёш мазкур манзилларнинг ҳар бирида 13 кун ва 1/3 кун туриб ўтади. 28 та манзилнинг кунлари қўшилиб бир йил бўлади.

Қизиқ томони шундаки, бу саналарда нафақат табиатда, инсон руҳиятида ҳам турли ўзгаришлар содир бўлади. Адиб Фармон Тошев ўз назмида ана шу ўзгаришлар, умуман инсон руҳиятининг турфа ҳолатларини тасвирлашга интилади. Шу аснода шоирнинг Сунбула, Мезон, Ақраб, Жавзо, Асад, Қавс, Ҳут буржлари номи билан баёзлари юзага келди ва ўқувчилар ҳукмига ҳавола этилди.

Ижодкор мазкур тўпламини “Ҳамал баёзı” деб номлаган. Гарчи ном рамзий ҳисоблансада, бу сатрларда сиз инсон руҳиятининг табиат ўзгаришларидаги сеҳрли ҳолатлари тасвирига дуч келасиз. Хусусан, мумтоз жанрдаги ғазал, таҳмис, рубоий ва маснавийларни мутолаа қилиб, дилингизга яқин туйғуларга ошно бўласиз.