Ermuhammad Shermatov: O'tmishdan kelgan adolatli nidolar

Ermuhammad Shermatov: O‘tmishdan kelgan adolatli nidolar

Bir asrlik tarix, murakkab taqdirlar va adolat yo‘lidagi kurash — tajribali huquqshunos Ermuhammad Shermatovning ushbu asarida O‘zbekiston adliya tizimining o‘tmishi milliy davlatchilik tarixi bilan uzviy bog‘liqlikda yoritiladi.

Kitob 1917–2022-yillarni qamrab olib, Turkiston adliya xalq komissarlari va O‘zbekiston adliya vazirlarining faoliyati, tizimning shakllanishi hamda rivojlanish bosqichlari haqida hikoya qiladi. Arxiv hujjatlari, tarixiy va adabiy manbalar asosida jamlangan ma’lumotlar orqali o‘quvchi sud, prokuratura va boshqa huquqni muhofaza qiluvchi organlar tarixiga ham nazar tashlaydi.

Ikki bobdan iborat asarda adliya rahbarlarining hayot yo‘li bilan birga XX asrning fojiali voqealari, siyosiy qatag‘onlar va nohaq ayblangan insonlarning nomlarini oqlash jarayonlari ochib berilgan. Shermat Ermatov, Xadicha Sulaymonova kabi shaxslar haqidagi hikoyalar tarixiy voqealar ortidagi inson taqdirlarini yaqindan anglash imkonini beradi.

Boy illyustrativ materiallar bilan bezatilgan ushbu nashr huquqshunoslar, tarixchilar, tadqiqotchilar, talabalar va yurtimizning yaqin o‘tmishiga qiziquvchi kitobxonlar uchun qimmatli manbadir. O‘zbekistonning huquqiy taraqqiyoti va adolat yo‘lida xizmat qilgan insonlar merosini o‘rganishni istasangiz, bu asar kutubxonangizdan munosib o‘rin egallaydi.