Bahodir Bahrom: Gulimoh

Ko‘zmunchoq! Tilimizda shunday samimiy so‘z bor. Ota-bobolarimizning ko‘zga yaqin, kelishgan farzand-u nabiralariga qarata aytiladigan “Ko‘z tegmasin” iborasini ko‘p eshitganmiz. Ehtimol, shu so‘zdan ilhomlanib O‘zbekiston xalq shoiri Sirojiddin Sayyid ham kitoblaridan birini “So‘zmunchoq” deb nomlagandir.

Adabiyotimizda ham ana shunday o‘sib kelayotgan ko‘rkam nihollarning bog‘ga aylangulik bo‘yi bor. Bu bog‘larning hosili mo‘l bo‘lishini niyat qilib, bir turkum kitoblarni “So‘zmunchoq” rukni ostida nashr etishni reja qildik.

Shoir Bahodir Bahromning “Gulimoh” nomli she’riy to‘plami o‘zining betakror ruhi va latofati bilan o‘quvchini o‘ziga rom etadi. To‘plamda shoir tug‘ilib o‘sgan ko‘hna Palangdara qishlog‘i, uning tengsiz tabiati, teran qadriyatlari va el urf-odatlari betakror so‘z chizgilarida ifoda etiladi.

Ijodkorning she’rlarida tabiat manzaralari, bolalik xotiralari, ona zaminga bo‘lgan beqiyos mehr va sadoqat, muhabbat va javobsiz izhorlar samimiy obrazlarda aks etadi. Shoirning nozik tuyg‘ulari, xalqona qochirimlari hamda o‘ziga xos musiqiy ohangi o‘quvchini hayratga sola oladi.

“Gulimoh” – chin ma’noda inson qalbining hissiyotlar bilan so‘zlashuvi, ruhiy uyg‘onish jarayonidir. O‘ylaymizki, she’riyatni, so‘z mo‘jizalarini qadrlaydigan har bir o‘quvchi uchun ushbu to‘plam munosib sovg‘a bo‘la oladi.