Otabek Mahkamov: Yuksaklik sari tasodif bo'lmagan 100 ta uchrashuv (Fleksibl muqova)

Har bir insonda taqdirini oʻzgartirib yuboruvchi va kelgusi hayot yoʻlini belgilab beruvchi uchrashuvlar boʻladi. Otabek Mahkamovning omadi shundaki, uning umr yoʻlida butunboshli kitobga jamlasa boʻladigan koʻplab ana shunday uchrashuvlar yuz bergan. Uning yuristlik va oʻqituvchilikdan tortib aktyorlik, jurnalistik, teleboshlovchilik, blogerlik hamda motivator notiqlikka qadar boʻlgan yorqin kasbiy faoliyatidan kelib chiqadigan boʻlsak, buning ajablanadigan joyi yoʻq.

Ushbu kitob qahramonlari orasida Hillari Klinton, Gordon Ramzi, Antonio Banderas, Devid Kopperfild, Enrike Iglesias, Farrux Zokirov, Daniel Redkliff kabi mashhur insonlar hamda dunyo miqyosidagi yulduz boʻlmasa-da, koʻpchilikka taniqli shaxslar bor. Otabek Mahkamov ilk daqiqalardanoq suhbatdoshining eʼtiborini jalb etish, uning yangi, baʼzan kutilmagan jihatlarini ochib berish qobiliyatiga ega. Shu boisdan mazkur kitobda jamlangan tasodif boʻlmagan har bir uchrashuvning oʻziga xos qiziqarli tarixi bor.

Nihoyat, kitob samimiyat bilan yozilgan. U hayot, uning darslar, quvonchlari, fojialari, yoʻqotishlari va gʻalabalari haqida. Undan barcha zamon va xalqlarga xos hazil-mutoyiba, teran mulohazalar, oʻtkir mushohadalar, tarixiy misollar hamda hikmatli soʻzlar ham oʻrin olgan.
 

Mazkur kitob birinchi nashrda uch tilda - o‘zbek, rus va ingliz tillarida bosib chiqarilgan edi. Ushbu yangi nashr esa faqatgina o‘zbek va ingliz tillarida chop etildi. Buning sababi shundaki, muallif e’tiborini aynan o‘zbekzabon yoshlarga qaratishni, o‘zbek yoshlariga ko‘plab davlatlarga borib, taniqli insonlar bilan ko‘rishib suhbatda bo‘lish aql bovar qilmas ish emasligini, bu ularning xam qo‘lidan kelishi mumkinligini ko‘rsatib berishni maqsad qilgan. Undan tashqari, bu orqali milliy kontent boyiydi, o‘zbek tili nufuzi va mavqei yanada oshadi.

Muallif ushbu ijodiy loyihadan tushgan mablag‘ning bir qismini O‘zbekistondagi og‘ir kasalliklarga chalingan va dori-darmonga moddiy imkoni bo‘lmagan bolalarni davolash uchun ajratishni rejalashtirgan.