Charlz Uilan: Yalang‘och iqtisodiyot. Murakkab sohaning sodda qiyofasi

Dunyo kitobxonlariga sevimli boʻlib ulgurgan “Yalangʻoch iqtisodiyot. Murakkab sohaning sodda qiyofasi” kitobi endi oʻzbek tilida!

Charlz Uilanning “Yalangʻoch iqtisodiyot” nomli kitobida iqtisodiyotning mohiyati hamda dolzarb masalalari sodda va tushunarli, barchamizga tanish hayotiy misollar bilan yoritilgan. Kitobda murakkab chizmalar yoki sirli formulalar yoʻq, balki moddiyat dunyosida qanday qonuniyatlar hukmronlik qilishi va davlatlar nimaning hisobiga boyishi tushuntirilgan. Asarni oʻqiy boshlaganimizda muallif ulkan iqtisodiyot olamidagi yoʻlboshchimizga aylanib, bu olamning eng chekka burchaklarigacha biz bilan sayohat qiladi. Uilan ‒ ishonchli yoʻlboshchi, uning biz bilan olib boradigan suhbati esa samimiy va doʻstona ruhda kechadi.

Maroq bilan oʻqiladigan ushbu kitob oʻquvchida iqtisodiy savodxonlik oshishiga xizmat qiladi. Kitobxonni fanning tub mohiyati bilan yuzlashtirib, kunning eng muhim iqtisodiy muammolarini tushunadigan oʻqimishli fuqaroga aylantiradi. Uilan iqtisodiyotni chizma, diagramma va tenglamalarsiz ham tushuntirib berish mumkinligini isbotlab beradi. U iqtisodiy tahlilni juda ham qiziqarli uslubda izohlaydi. Bu kitob kollej va institutlarning iqtisodiyot kurslari uchun ancha foydali qoʻshimcha darslik boʻla oladi. Eng mu­­­himi ‒ iqtisodiyotni oʻta zerikarli va mijgʻov fan sifa­tida koʻrgan hamda uni oʻrganishdan bosh tortgan inson­­­larning qarashlarini oʻzgartirib yuborishga qodir.

Kitob haqida OAV va mashhurlar fikri:

“Bravo, Charlz Uilan, imkonsiz narsani: iqtisodni oʻrganishni qiziqarli, tushunarli va kulgili qilganingiz uchun.“

— Debora Kopaken Kogan, “Shutterbabe: Adventures in Love and War” muallifi

“Men ushbu kitobni ozgina ogʻriq va katta zavq bilan iqtisodiyotni tushunishni istagan har bir kishiga tavsiya qilaman.“

― Gari Bekker, 1992-yil iqtisodiyot boʻyicha Nobel mukofoti sovrindori

“Aniq, qisqa, maʼlumotga boy va dono.“
— Chicago Tribune

Muallif haqida:

Charlz Uilan — amerikalik professor, jurnalist, maʼruzachi va “Unite America” tashkilotining asoschisi va hamraisi. Uilan “Yalangʻoch statistika”, “Yalangʻoch iqtisodiyot” va “Yalangʻoch pul” kabi bestseller kitoblarning muallifi.

Uilan 1988-yilda Dartmut kollejini tamomlagan; u Alpha Delta birodarligining aʼzosi boʻlgan. 1997-yildan 2002-yilgacha The Economist gazetasining Oʻrta Gʻarbdagi muxbiri boʻlgan. U shuningdek, Chicago Tribune, The New York Times, The Wall Street Journal va Yahoo!Finance uchun maqolalar yozgan.