Рюноске Акутагава: Расёмон дарвозаси

Болалигида онасининг руҳий ҳасталикка чалиниши оқибатида тоғаси қарамоғида қолган Рюноске Акутагаванинг ҳаёти машаққатлар билан бошланди. Дастлаб, япон ривоятлари ҳамда хитой классик адабиётига қизиқиш билдирган Акутагава кейинчалик Ғарб адабиёти билан яқиндан танишди. Токио император институтида инглиз адабиёти йўналишида таҳсил олди. Адибнинг ҳиссиётга лиммо-лим қалби атрофидаги ҳар бир воқеадан таъсирланиши оқибатида муаллиф ўзи гувоҳ бўлган реал ҳодисаларни асарларида акс эттира бошлади. Яқин танишлари прототипи ёзувчи асарлари қаҳрамонлари сифатида тасвирланди. Адиб қисқа ҳаёти давомида ơънлаб ўлмас асарлар яратиб, "Япон ҳикоячилик мактаби дарғаси", дея эътироф этилди. 1935-йилда таъсис этилган Акутагава мукофоти йилнинг энг яхши япон ёзувчисига топширилиши ҳам адибнинг япон адабиётида ўчмас из қолдирганидан далолат беради.