Tohir Malik: Sotilgan vijdon

Tohir Malik. Bu nomni o‘qishimiz bilan ko‘z oldimizda serqirra, sermahsul ijodkor, hayotbaxsh hikoyalari, o‘tkir syujetli qissa, romanlari, fantastik hamda maʼrifiy, diniy-dunyoviy asarlari bilan millionlab kitobxonlar qalbini zabt etgan atoqli, kitoblari sevib, qo‘lma-qo‘l o‘qiladigan ardoqli yozuvchi siymosi gavdalanadi. Biroq daryodil adibning vafoti (2019 yil 16 may) adabiyot ixlosmandlari qalbini huvillatib ketdi. Go‘yo bir maydon bo‘shab qolgandek bo‘ldi. Po‘rtanali ummonda suzayotgan hayot qayig‘i manzilga yetib, hali aytilishi kerak bo‘lgan so‘zlar, yozilajak asarlar, ibratli suhbatlar, tartib berilishi lozim bo‘lgan kitoblar qolib ketdi.

Hayot- abadiy, umr esa o‘tkinchi. O‘zbekiston xalq yozuvchisi Tohir Malik 72 yillik hayoti mobaynida qoldirgan boy, ulkan adabiy meros hali asrlar davomida yosh avlodni tarbiyalashda, ularning maʼnaviy qiyofasini shakllantirishda dasturul amal bo‘lib xizmat qiladi. Yozuvchi istiqlol yillarida nihoyatda sermahsul ijod qilgan edi. Adib merosini asrab-avaylash, yosh avlod qo‘liga yetkazish esa yozuvchining farzandlari va shogirdlariga ulkan masʼuliyat yuklaydi. Shu maʼnoda xayrli ishga qo‘l urildi - Tohir Malik nomidagi nashriyot-matbaa uyi tashkil etildi.

Mazkur to‘plam adib nomidagi nashriyotda chop etilgan ilk kitob sanaladi. Nashriyot birin-ketin Tohir Malikning barcha asarlariga chop etadi. Bu nafaqat adibning muxlislariga, balki barcha kitobxonlarga ham manzur bo‘ladi, degan umiddamiz.