Тасбиҳга оид оятлар тафсири: Қушлар тасбиҳ айтганда

Ҳавода учувчи қанотли жонзотларни араб тилида "тоир", дейилади. "Соффот" эса кенг ёйилган, деганидир. Араблар ипга тизиб қуритилган гўштни шундай номлашган. Қушлар ҳавода қанотларини ёйиб, Яратган Раббисини зикр этади. Аллоҳ таоло уларга ҳам дуо қилишни, тасбеҳ айтишни билдирди. Уларни шунга илҳомлантирди ва улар қачон ва қайси вақтда Роббисига нима дейишни ҳам билишади.

Абу Собит раҳматуллоҳи алайҳ айтади: "Мен Абу Жаъфар Боқир билан бирга ўтирган эдим. У зот менга деди: Бу қушлар қуёшнинг ботиш ва чиқиш пайтларида нима дейишаётганини биласизми?" Мен: "Иўқ, билмайман", дедим. У зот: "Улар Роббиларини улуғлаяпти, бугунги кунга Ундан куч-қувват сўраяпти", дедилар.