Шуҳрат: Жаннат қидирганлар (Зукко китобхон)

"Жаннат қидирганлар" — ўзбек ёзувчиси Шуҳрат қаламига мансуб роман. Илк бор 1968 йил Тошкент шаҳрида чоп этилган. Бир неча марта турли нашриётларда, жумладан, Ғафур Ғулом номидаги нашриёт-матбаа ижодий уйида ҳамда „Қалдирғоч“ нашриётида қайта нашр этилган. „Жаннат қидирганлар“ романи „Олтин зангламас“ романининг мантиқий давоми ҳисобланади. Роман ўзбек ўқувчилари орасида яхши танилган. „Қалдирғоч“ нашриёти романни „Ўзбек адабиёти олтин фонди“ туркумига киритган.

„Жаннат қидирганлар“ романида ватангадолик фожеалари бадиий ифодасини топган. Хусусан, романда ҳақиқат (жаннат) ахтариб яшовчи кишиларнинг икки хил кўриниши тасвирланган. Романда муаллиф Совет Иттифоқи даврида инсон ҳақ-ҳуқуқларининг топталишини ўзи гувоҳ бўлган воқеаларни умумлаштирган ҳолда тасвирлаган. Эътиқод ватанпарварлик, виждон амрини ҳар бир кишининг жамиятдаги мавқеи ва инсоний қадр-қимматини белгиловчи муҳим маънавий қадриятлар сифатида талқин этган. Роман нашр этилгандан кейин, айримлар муаллифни миллатчиликда айблаган.