Shayx Alouddin Mansur: Qur’oni Azim tafsiri (1-5 jild)

«Qurʼoni Azim tafsiri»

Ilk bora kitob holida chop etilgan Qurʼoni Karimning o‘zbek tilidagi maʼnolari tarjimasi muallifi Shayx Alouddin Mansur tomonidan yozilgan ushbu tafsir tilining ravonligi bilan ko‘pchilikning eʼtiboriga tushgan. Muallif kitob muqaddimasida "Qurʼoni Karim maʼnolarini arabchadan boshqa tillarga tarjima qilish va o‘zga xalqlarni ham Olloh taolo so‘zining mazmunidan bahramand qilish shariati Islomiyya tarafidan buyurilgan ishlardan hisoblanadi", deya taʼkidlaydi.

Aziz o‘quvchi! Mana qo‘lingizda Qurʼoni Karimning maʼno tarjimasi turibdi. Ushbu Ulug‘ Kitobni chuqur diqqat-eʼtibor bilan o‘qisak, bu Ilohiy Moʻjiza go‘yo bundan o‘n to‘rt asr ilgari emas, balki, hozir o‘zimizga tushirilganday – har bir so‘zi hayotimizni haqiqiy inson bo‘lib yashab o‘tishimiz uchun o‘ta zarur so‘z ekanini payqaymiz. Zotan bu so‘z barcha olamlarning Egasi, mangu barhayot Olloh taoloning hech qachon o‘lmaydigan so‘zidir. Men – bandai ojiz ushbu Ulug‘ so‘z maʼnolarini Siz azizlarga yetkazmoqchi bo‘ldim. Agar to‘g‘ri yetkaza olgan bo‘lsam, bu Yolg‘iz Yaratganning marhamatidan, o‘tib ketgan xatolari bo‘lsa, bu mening nuqsonlarimdir. Men Olloh taolodan ushbu Kitobni o‘qigan har bir insonni O‘zining haq yo‘liga hidoyat qilishini so‘rayman hamda sizlardan Kitobni o‘qib, Kalomulloh maʼnolari bilan oshno bo‘lgan soatlaringizda, agar yodingizga kelsa menda Qurʼoni Karimga ilk muhabbat uyg‘otgan ustozi avvallarim bo‘lgan marhum Ota va Onamning haqlariga duoyi xayr qilishlaringizdan umidvor bo‘lib qolaman.

SHAYX ALOUDDIN MANSUR