Шайх Алоуддин Мансур: Қуръони Азим мухтасар тафсири (А5)

«Қуръони Азим мухтасар тафсири»

...Юқорида зикр қилинган далиллардан маълум бўлганидек, Қуръони Карим маъноларини арабчадан бошқа тилларга таржима қилиш ва ўзга халқларни ҳам Оллоҳ таоло Сўзининг мазмунидан баҳраманд қилиш Шариати Исломийя тарафидан буюрилган ишлардан ҳисобланади.

Шу боис мен Қуръони Карим маъноларини элимизга етказиш ниятида уни яхшироқ урганиш учун араб тилидаги юзлаган тафсир китобларини ўқиб чиқдим ва бу меҳнатлар натижасида Оллоҳ таолонинг фазлу марҳамати билан камина Марказий Осиё мусулмонлари диний идораси ва Ўзбекистон ёзувчилар уюшмасининг ташаббуси билан Тошкент шаҳрида, Марказий Осиёдаги энг йирик Исломшунос олимлар иштирокида "Қуръони Карим маъноларини ўзбек тилига таржима қилиш” мавзуйида ўтказилган ўзига хос мусобақада ғолиб бўлдим ва Оллоҳ таолонинг инояти билан менга 1990-91-йиллари тарихимизда илк марта Қуръон маъноларини аслиятдан - арабчадан замонавий ўзбек тилига таржима қилиш ва унга изоҳлар ёзишдек улуғ бахт насиб этди. Ўшанда мен йигирма уч ой мобайнида бу хайрли ишни ниҳоясига етказдим ва ушбу таржима 1992-93-йилларда Тошкент шаҳрида, аввало "Шарқ юлдузи" ойномасида, сўнгра "Чўлпон" ва "Fафур Ғулом" нашриётларида қайта-қайта қарийб бир миллион нусхада босилиб, элимизнинг дуо ва олқишларига сабаб бўлди.

Шайх Алоуддин Мансур