Shayx Muhammad Sodiq Muhammad Yusuf: Kifoya

Shayx Muhammad Sodiq Muhammad Yusuf hazratlarining “Kifoya” deb nomlangan uch jildlik kitoblari.

Ushbu 3 jildlik mujalladning to‘liq nomi «Kifoya sharhi Muxtasari Viqoya»dir, yaʼni u diyorimizda mashhur bo‘lgan «Muxtasari Viqoya»ning tarjima va sharhidir. «Muxtasari Viqoya»ning asl nomi “Niqoya” bo‘lib, uning muallifi hijriy 747 sanada vafot etgan mashhur faqih Sodrush-shariyʼa Ubaydulloh ibn Masʼud al-Buxoriydir. Ubaydulloh ibn Masʼud bu kitobni bobosi Mahmud ibn Sodrush-shariyʼaning «Viqoyatur Rivoya fiy masailil Hidoya» nomli kitobini muxtasar qilish – qisqartish ila yuzaga keltirgan, biroq ahli ilmlar va xalqimiz orasida «Muxtasari Viqoya» nomi ila mashhur bo‘lib ketgan. «Muxtasari Viqoya» hanafiy mazhabidagi eng moʻtabar kitoblardan biri hisoblanadi. Zero u hanafiy mazhabdagi asosiy eʼtimodga sazovor bo‘lgan to‘rt matndan biri bo‘lmish “Viqoya” kitobining muxtasaridir. Ulamolar va tolibi ilmlar bu kitobni qadimdan eʼzozlab keladilar.
“Kifoya” ning birinchi juzi “Poklik” va “Namoz” kitoblaridan iboratdir. Shuningdek ushbu kitobdan fiqh ilmining taʼrifi, tarixi, manbalari va ahamiyati haqida, fiqhiy mazhablar va ular o‘rtasidagi farʼiy ixtiloflar haqidagi maʼlumotlar o‘rin olgan.