Sayyid Mahmudxon Taroziy: Qur’oni Karim (Tarjima va muxtasar tafsir)

Payg'ambarimiz Muhammad alayhissalomga ulur sahobalardan biri Abu Zarr G'iforiy roziyallohu anhu: «Ey Rasululloh, menga nasihat qiling?» deganlarida u zot ikkita narsani uqtirdilar: birinchisi - taqvo, ikkinchisi - Qur’oni karimni tilovat qilish! Demak, Qur’oni karimni ko'p o'qish mo'minlar uchun juda muhim va lozimdir. O'zini musulmon sanaydigan har bir inson Allohning Qur’onini benuqson o'qish va shu bilan birga uning ma’no-mazmunini anglash salohiyatiga ega bo'lishi lozim.
Ushbu "Qur’oni karim (tarjima va muxtasar tafsir)" kitobi muhojirlikda umr o'tkazgan Islom olamidagi ulug' siymolardan biri, musulmonlar ichida Oltinxon to'ra nomi bilan mashhur bo'lgan zot Sayyid Mahmudxon Sayyid Nazirxon o'g'li Taroziy hazratlari qalamiga mansub bo'lib, mazkur kitob 1993 yil Qatarda chop qilingan eski o'zbek yozuvidagi nusxasi asosida tayyorlandi. Oyatlar tarjimasi imkon qadar o'zbek adabiy tili qoidalariga muvofiqlashtirildi va matnning tarixiy ahamiyatini hisobga olgan holda zarur o'rinlarda asliyat ruhi saqlandi.