Пиримқул Қодиров: Мерос

„Мерос. Эрк. Қадрим“ — ўзбек ёзувчиси Пиримқул Қодиров қаламига мансуб қиссалар тўплами. 1975 йил Тошкент шаҳрида Ғафур Ғулом номидаги Адабиёт ва санъат нашриётида чоп этилган. Тўпламга Қодировнинг „Мерос“, „Эрк“, „Қадрим“ қиссалари киритилган. „Қадрим“ қиссаси 1961 йил, „Эрк“ қиссаси 1968 йил, „Мерос“ қиссаси эса 1974 йилда ёзилган.

„Қадрим“, „Эрк“, „Мерос“ қиссаларида инсон шахсига эҳтиром, эрк, ўзлик, қадрият муаммолари ёритилган. Ҳар бир қиссанинг марказида, асосан, инсон туради. Қиссаларда инсонни ўйга, ҳаяжонга солган муаммолар ёритилган. Ёзувчи ҳаётга энди кириб келаётган йигит образи орқали бошқаларни қарамликка қарши курашишга, қадр-қиммат, ўзлик, ғурурни ҳимоя қилишга ҳамда мустақиллик учун курашишга чақирган.

Қиссалар ҳақида асар ёзилганидан кейин йигирма йил ўтиб ёзувчининг ўзи шундай деган: „Тоталитар империя бизни қарам аҳволга солиб, қадр-қимматимизни ерга уришини ич-ичимиздан сезиб, руҳан беҳад қийналардик. Лекин буни очиқ айтолмай, „Қадрим“, „Эрк“ каби қиссаларда ички эркини йўқотган, мутелик дардига гирифтор бўлган қаҳрамонлар ҳаётини ҳамдардлик билан кўрсатиш орқали озодлик ва мустақилликка бўлган ташналикни қондиришга интилардим“.