Меҳригиёҳ (машҳур қўшиқлар кутубхонаси)

Халқ тили билан айтиладиган ашулалар ҳамма даврларда барча тоифаларнинг ҳамиша севиб тинглайдиган қўшиқлари бўлганлигини эътиборда тутиб, "машҳур қўшиқлар кутубхонаси" рукнини миллий қўшиқчилигимизнинг олтин фондидан жой олган энг машҳур ашулалардан дасталанган китоб билан бошлашни маъқул топдик. Чунки халқ оғзаки ижоди ёзма адабиётнинг сарчашмаси ҳисобланади. Халқ ижодкорлигининг бебаҳо дурдонлари бўлган мазкур қўшиқларнинг шакли ихчам, мазмуни чуқур ва серқирра, тимсолу ташбеҳлари гўзал ва бетакрор, сўз ва иборалари нозик, таъсирчан,тили содда ва тушунарли, услуби равон ва жарангдор бўлганлиги учун ҳам қадимдан кенг тарқалган ва оммабоп бўлган. Шунинг учун ҳам санъаткорлар халқ қўшиқларига доимий равишда мурожаат қилиб келишган. Халқ бахшилари ва фолклор ижрочилари оғзидан ёзиб олинган шеъру қўшиқлар эмас, балки айнан куйга солиниб, ҳофизлар ва хонандалар томонидан ижро этиб келинаёган ашулалардан тартиб берилганлиги жиҳатидан мазкур мажмуа маданият ва санъат аҳли учун ўзига хос қўлланма бўлиши билан бирга қўшиқсевар халқимизга ҳам муносиб туҳфа бўлади.

Тузувчи ва тўпловчи: Эргаш Очилов