Карел Чапек: Битва с саламандрами

Қўлингиздаги ушбу китоб чех адиби Карел Чапек (1890-1938) қаламига мансуб "Вáлка с млокй" романини рус тили орқали (чех тилидан рус тилига А. С. Гурович "Война с саламандрами" номи остида таржима қилган) Алимулла Ҳабибуллаев томонидан "Саламандралар билан жанг" номи остида таржима қилинган кўринишидир.

Машҳур чех ёзувчиси Карел Чапек ўзининг «Саламандралар билан жанг» романида 1930 йиллардаги халқаро сиёсатни, шу жумладан, Германияда бош кўтарган фашизмни қаттиқ ҳажв қилган. Романга гўё Индонезия оролларидан бирида учраган ақлли махлуқ саламандраларни «одамийлаштириш» ҳақидаги фантастик уйдирмани асос қилиб олинган.

Улкан фойда олиш учун ҳар қандай қабиҳликдан қайтмайдиган саноатчилар саламандралардан арзон ишчи кучи сифатида фойдаланадилар. Саламандралар эса ўз навбатида инсоният жамиятининг барча иллатларини ўзлаштириб олиб, одамлар билан рақобат қила бошлайдилар. Саламандралар ҳаётини тасвирлар экан, ёзувчи ўша давр сиёсатининг сатирик манзарасини чизиб беради.

Ушбу китоб илк бор ўзбек тилида 1979 йилда чоп этилган. Бу даврдаги нашрида айрим сўз ва жумлаларнинг маъноси изоҳланмаган ёки русча сўзлар, ёки байналмилал жумлалар орқали берилган эди. Бу ҳолат билан биз таржимонларни ёки ўша давр нашриёти ходимларини камситиш фикридан йироқмиз. Фақат ҳозирги давр китобхонларининг талаб ва илтимосларига асосан асар таржимасига қўшимча иқтибослар киритилди ва ҳозирги ўзбек адабий тили қоидалари асосида қайта таҳрирланди.