Жанни Родари: Қандай хатолар бўлади

Жанни Родари (ёки Джанни Родари) — машҳур итальян болалар ёзувчиси ҳамда журналист. У 1920-йил 23-октябрда шимолий Италиянинг Оменя шаҳарчасида, ширин кулчалар ёпувчи новвой оиласида дунёга келди. 10 ёшида отаси Жузеппе Родари тўсатдан вафот этади, шундан сўнг онаси бой хонадонларда оқсочлик қилиб фарзандларини боқишга мажбур бўлади.
Жанни болалигидан хаёлпараст, ҳар нарсага иштиёқманд эди. Ҳар қандай бола каби у ҳам кўплаб орзулар қилди. Аввалига скрипка билан шуғулланди, кейин рассом бўлишни хоҳлади. Аммо буларнинг бари орзулигича қолиб кетди. 17 ёшидан ўқитувчилик қилишни бошлайди ва унинг ёзувчиликка қўйган илк қадами ҳам шу бўлди. Бироз муддат ўтиб болаларга аталган шеърлари, ҳикоя, эртак ва қиссалари дунёга келди ва ўқувчилар кўнглидан ўрин олди. Унинг асарлари турли тилларга таржима этилган, бутун дунё китобхонлари "Чипполинонинг саргузаштлари", "Рим эртаклари", "Желсомино ёлғончилар мамлакатида", "Осмондаги торт" каби китобларни севиб ўқийдилар. Қўлингиздаги ушбу китобчада ҳам адибнинг қизиқарли эртаклари жамланган.