Gulnora Rahmon: Yolg'iz yo'lovchi

Gulnora Rahmonning kartinalarida adabiy bo‘yoqlar ustuvor. Hikoyalarida esa musavvirona kayfiyat ko‘zga tashlanadi. Bu esa kitobning o‘qishli bo‘lishini ta’minlaydi. Shuning uchun ham hikoyalari yurakka yaqin, ko‘z oldingizdagi tabiiy hayot manzaralaridan iborat. Muallif o‘z hikoyalarida hayotga mehr bilan qaraydi. Ayniqsa, “Aytilmagan sir”, “Umidli dunyo”, “Yolg‘iz yo‘lovchi” asari qahramonlari siz-u bizga o‘xshagan insonlar taqdiriga tutash. Yozuvchining o‘ziga xos uslubi bor. U murakkab falsafiy fikrlarni ham sodda so‘zlar bilan ifodalab o‘quvchiga yetkazib beradi. Kitobni bir o‘tirishda qanday o‘qib tugatganingizni bilmay qolasiz. Aziz kitobxon, Gulnora Rahmonning “Yolg‘iz yo‘lovchi” hikoyalar to‘plami sevimli kitoblaringizdan biriga aylanishiga ishonamiz.