Билимдон. Оила ва дўстлар даврасида ўйнанг!

Сиз интеллектуал ўйинларнинг ишқибозимисиз? Ундан чексиз адреналин оласизми? Бу ҳиссиётларни ўз яқинларингиз билан бўлишишга нима дейсиз?

Эндиликда турли номлар остида оммалашган интеллектуал ўйинни ўз уйингизда ёки дўстлар даврасида ўйнаш имконияти СИЗда бор. «Билимдон» мана шундай муҳитни тақдим этади!

Ўйин талаби. Иштирокчилар 3-7 кишидан иборат бўлади. Саволлар 12 ёшдан катта ҳаваскор билимдонлар учун мўлжалланган.

Ўйин майдони. Марказга ўйин ғилдираги (барабан) ўрнатилади, унинг атрофида савол карточкалари қўйиладиган 12 та сектор жойлашади.

Савол карточкалари. Уларнинг юзасида савол матни ва унинг рақами кўрсатилган бўлади.

Жавоблар ва қоидалар китобчаси. Унда ўйиннинг барча қоидалари батафсил тушунтирилган бўлиб, саволлар жавоби ҳам келтирилган.

Ўйин тартиби. Ўйинчилар биринчи навбатда бошловчи ким бўлишини келишиб олиши лозим. Бошловчи барча савол карточкаларидан 12 тасини танлаб олиб, ўйин майдонидаги секторларга териб чиқади. Бунда савол матни ёпиқ ҳолда, «Билимдон» ёзуви эса тепада бўлиши керак. Ўйин бошланишидан олдин билимдонлар жамоаси ўзига САРДОР танлайди.

Қоидалар китобчаси ўйин вақтида бошловчида бўлиши зарур. Билимдонлар жавобларни кўрмаган бўлиши шарт.

Бошловчи ёки билимдонлардан бири ғилдиракни соат стрелкаси йўналиши бўйича айлантиради ва ўйин бошланади.

Ғилдирак (барабан). Махсус картон ғилдирак стрелка билан жиҳозланган бўлиб, ўйин майдонининг ўртасига ўрнатилади. Стрелкани айлантириш орқали қайси сектордаги савол ўйналиши аниқланади.

Агар стрелка савол ўйнаб бўлинган бўш секторга тушса, у ҳолда бошловчи соат стрелкаси бўйича кейинги савол карточкасини олади.

Ҳисоб таблоси. Тақвим кўринишидаги табло орқали билимдонлар ва бошловчининг олган очколари ҳисоблаб борилади. Чап томондаги рақамлар билимдонлар топган саволлар сонини, ўнг томондаги рақамлар эса топилмаган саволлар сонини кўрсатади.

Ўйин мақсади. Билимдонлар жамоасининг мақсади саволларга жавоб топиб, 6 очко тўплашдан иборат. Ҳар бир тўғри жавоб учун билимдонлар 1 очко олади. Ҳар бир нотўғри жавоб учун 1 очко бошловчига берилади. Агар бошловчи 6 очко тўпласа, билимдонлар жамоаси ютқазади.

Савол шакллари. Саволлар турли хил кўринишда бўлиб, ҳақиқий интеллектуал ўйин муҳитини ҳис қилишга ёрдам беради.

Карточкаларнинг 50 тасида матннинг ўрнига видео-саволлар ҚР-коди туширилган. Уни кўриш учун «Билимдон» мобил иловасидаги «Видео-савол» бўлимига кириш ва телефон камерасини ҚР-код туширилган карточкага йўналтириш зарур.

Саволнинг жавоби мобил иловадаги «Жавоблар» бўлимидан топилади.

«Билимдон» мобил иловасини Плай Маркет ва АппСторе орқали юклаб олишингиз мумкин.