Баҳодир Карим: Абдулла Қодирий феномени

Ҳар бир авлод Абдулла Қодирий ижодини ўзича ўқийди, уқади, тасаввур қилади, ардоқлайди. Адиб романлари ҳар қандай ўқувчига ҳаётийлиги, гўзаллиги, миллийлиги, тозалиги, тириклиги, адабий кўлами, тасвир жозибаси, таъсир қуввати билан завқ-шавқ бағишлайди. Баҳодир Каримнинг ушбу китобида Қодирийшунослик тарихи, адиб ҳаёти ва ижодига дунё олимларининг муносабати бадиий маҳорат, биринчи ўзбек романининг қадр-қиймати, бошқаларга таъсири, хронотопи, маънавий-ахлоқий талқини, умуман, бадиий матни тадқиқига оид манбалар жамланган. Олим ёзувчининг юрак дардини ҳис этган, адабий-эстетик идеалини тушунган ва баҳоли қудрат тушунтирган. Ўқувчи китоб саҳифаларида Абдулла Қодирий ижодининг янгича талқинларини, иловада эса асарларининг илк нусхаларидан айрим намуналар ўқийди. Умид шулки, Абдулла Қодирий қолдирган маънавий мулк ўтмишга айланмайди, замонлар билан бирга юради, келажакка хизмат қилади. Шу маънода китобдаги ҳайрату ҳақиқатлар, талқину топилдиқлар Абдулла Қодирий феноменини, улуғ адибнинг мегаобразини тасаввур қилишда сиз азизларга ёрдам беради, албатта.