Алишер Умирдинов: Талаба дўстимга 78+ тавсия

Университет ёки институтдаги 4 йил сиз учун умрингиздаги энг қадрли давр. Бу даврда сиз ТАЛАБА дея номланиб, оилангиз аъзолари ҳам ўқишдан бошқа масалаларда сиздан катта ёрдам кутишмайди. Демак, талабалик бир маънода оила ва жамият олдида энг кам масъулият талаб этиладиган давр ҳамдир. Аммо «олтин даврингиз» тугаши билан оилангиз ва жамият сиздан катта ишлар кутишни бошлашади. Ваҳоланки, умидларингизга қарши юқори маошли иш сизни кутиб тургани йўқ. Ўзбекистон меҳнат бозоридаги рақобат кун сайин қизиганидан қизимоқда. Кўнгилдагидек иш топиш эса ҳечам осон эмас.

Дўппини бир четга қўйиб, тафаккур қилишга уриниб кўринг: нима қилсак, университет остонасидан чиққанимиз ҳамон ҳаётимизнинг силлиқ ва фаровон кечишига эришиш мумкин? Қандай қилиб биз маоши ва муҳити яхши бўлган меҳнат жамоасининг аъзоси бўлишимиз мумкин? Университетни битирмай туриб ҳам бизни ишга олувчилар ишончини қозониш учун қандай амалий қадамларни ташлашимиз керак? Нима қилсак кейин афсус чекмаймиз? Ушбу китоб талабаларнинг мана шундай саволларига жавоб топиш мақсадида нашрга тайёрланди.