Абдусаид Кўчимов: Қайта туғилган бола

Ўсмирлик - инсон ҳаётининг энг мураккаб, энг қалтис, энг нозик давридир. Болаликдан балоғатга ўтиш босқичи ҳисобланмиш бу даврда характер шаклланади, кучли ҳис-туйғу, ғайрат-шижоат жўш уради; ўсмир қалб ҳиссиётга берилиб, мустақил бўлишга, ўз қиёфасини намоён қилишга интилади.

Қатор асарлари билан ўқувчилар меҳрига сазовор бўлган иқтидорли адиб Абдусаид Кўчимовнинг қўлингиздаги китобига киритилган қисса ва ҳикояларнинг барчасида айнан ана шу гўзал ва серташвиш манзаралар ўсмирлар руҳий оламида содир бўлгувчи ривожланиш жараёнлари бадиий талқин қилинади.

Китобни ўқир экансиз, юрагида кучли ҳис-туйғу, ғайрат-шижоат жўш ураётган, инжа хаёллар оғушида мустақил бўлишга, ўз сўзини айтишга интилаётган ажойиб йигит-қизларнинг ранг-баранг қиёфалари билан танишасиз. Ёш қаҳрамонларнинг ҳеч қайсиси бир-бирига ўхшамайди: бири таъсирчан, бири серғайрат, ташаббускор, меҳрибон, бири қўрс, бири жиззаки, яна бири сал нарсадан ранжувчи нозик таъб. Ўз-ўзини хиёл англаб, қалбида севги-муҳаббат ҳислари мавжлана бошлаётган бундай ёш юракларнинг мураккаб кечинмалари, ўзларига сирдош қидиришлари; баъзи бирларининг атрофдагилар эътиборини жалб этиш, кутилмаган ишлари билан катталарни ҳайратга солиш ва, ҳатто ўз яқинларини чўчитиб бўлса ҳамки, мақсадга эришиш ниятидаги хатти-ҳаракатларини кўрганда эса завқингиз келади, ёнида бўлгингиз, кўмак, маслаҳат бергингиз, йўл кўрсатгингиз келиб кетади. Ҳар-хил низолар, чорасизлик, ёлғизлик, ўзини камситилгандек ҳис қилиш, эркинликнинг чекланиши, катталар ва ёшларнинг бир-бирини тушунмаслиги ва, охир-оқибат, ўсмирнинг ўз оиласи, ўз жамоасидан узоқлашиши, камгап бўлиб, ўзининг ички ботиний дунёсига тушиб қолиши каби мураккаб ҳолатлар ҳам юксак маҳорат билан бадиий таҳлил қилинади.