Test: Honor 50 smartfoni. Googlening qaytishi

Honor kompaniyasi Huaweidan ajralib chiqqandan keyin birinchi marta xalqaro bozorga oʻz smartfonlarini chiqardi. Honor Huawei tarkibida boʻlmaganligi uchun smartfonga Google xizmatlari ham qaytdi. Bu nimani anglatadi? Huawei smartfonlaridan farqli ravishda Honorda Google Play, Google Maps, Gmail va Youtube kabi bir nechta xizmatlar ishlaydi. Menda 20 kun davomida Honor 50 smartfonini test qilib koʻrish imkoni boʻldi.

Texnik xarakteristikasi:

Operatsion tizim: Android 11 Magic UI

Oʻlchami: 6.57 diagonal

Ekran: OLED, 2340 x 1080 piksel, 120 Mhz

Protsessor: Snapdragon 778 G, 8 yadro

Xotira: 6 GB operativ, 128 GB doimiy xotira

Kamera: 108 MP + 8 MP + 2 MP + 2 MP

Old kamera: 32 MP

Akkumulyator: 4200 MaH

Ulanish imkoniyatlari: 5G tarmogʻida ishlaydi.

Narxi: 4 890 000 Soʻm

Dizayn.

Smartfonning eng yoqqan tomoni aynan dizayni boʻldi. Oʻzi Huawei ham dizayni bilan doim qulay boʻlgan. Honor 50 ekrani ikki tomoni bukilgan, ingichka (7,78 mm) qoʻlga juda qulay tushadigan smartfon boʻlgan. Uning yengilligi (175 gr) smartfondan foydalanishni juda osonlashtiradi. Tan olish kerak, doimiy ishlatadiganim iPhone 13 Pro Max oldida odam katta qulaylik sezadi. Agar smartfonni bugungi bozordagi eng oldi Samsung Galaxy S21 Ultra va iPhone 13 Pro Max bilan solishtirsa, aynan qulay dizayn uning yagona ustunligidir. Biz 4 890 000 lik smartfonni 14-16 million soʻmlik smartfonlar bilan solishtiryapmiz.

Telefonning old tomonida yon tomonga yengil bukilgan ekran va tepada ekran ichida oʻrtada old kamera joylashgan. Ekran sifati boʻyicha alohida eʼtirozim yoʻq. Full HD+ Oled ekran kundalik foydalanishga juda qulay. 120 Hz tezlikda ishlash imkoniyati ishlatish jarayonini ancha yoqimli qiladi.

Atrofdagi ramkalar ishlatish jarayonida noqulaylik tugʻdirmaydi. Orqa tomonda ikkita blok katta koʻzda kameralar joylashgan. Telefonning orqa tomoni yaltiroq plastikdan qilingan. Mana shu joyi odamda noqulaylik uygʻotadi. Yaltiroq plastik oʻzida barcha barmoq izlarini saqlab turadi. Demak, siz smartfonni yoki chexol bilan ishlatasiz yoki doimiy tozalab yurishga majbur boʻlasiz. “Kamolon”dan oshni yeb boʻlib, yogʻli qoʻlni tegizish umuman tavsiya etilmaydi.

Past tomonda karnaylar joylashgan boʻlib, ularning sifati boʻyicha ham alohida eʼtiroz yoʻq. Lekin, bilingki, bu yerda standart holat nazarda tutilgan. Bozorda hozirgi holatda ovoz sifati bundan yaxshiroq smartfonlar bor. Masalan, Mi 11da ikkita stereo karnay ovozni ancha yaxshi chiqaradi.

Telefonning orqa tomoni

Kamera.

Smartfonning men eng koʻp test qilgan qismi aynan kamerasi boʻldi. Kamera sifati 4 890 000 Soʻmlik smartfon uchun ancha yaxshi, lekin bozordagi eng zoʻr kameraga ega smartfonlarga nisbatan kamchiliklarni sezsa boʻladi. Avvalo, kamera haqida gapirganda, 108 MPlik asosiy kamerani eʼtirof etish kerak. Qolgan kameralar turli xil rejimlarda asosiy rasmga qoʻshimcha maʼlumot yigʻib berish uchun ishlatiladi.

Yorugʻlik yaxshi joylarda Honor 50 haqiqatdan ham sifatli rasmga oladi. Undagi sunʼiy intellekt rasmlar sifatini yanada yaxshilaydi. AI yoqib qoʻyilganda rasmlar ancha chiroyli koʻrinadi, lekin tabiiy emas. Yaʼni AI rasmni Instagrambop qilib beradi. Shu uchun ham AIni oʻchirib test qilib koʻrdik. Umuman, yorugʻlik muammo boʻlmagan joyda iPhone 13 Pro Max bilan doim bir xil rasmlar chiqdi. Bunga quyidagi ikkita rasm orqali guvoh boʻlishingiz mumkin.

Honor 50da olingan rasm

iPhone 13 Pro Maxda olingan rasm

Smartfon kamerasi bilan muammolar asosan yorugʻlik past tungi vaqtda boʻladi. Tungi foto rejimini yoqmasdan olingan rasmlarda yorugʻlik va detallar yetishmaydi, kamera kamchiliklari koʻrinib qoladi. Masalan, yorugʻligi past joyda portret rejimida olingan rasmlarda shovqinlar koʻrinib qoladi.

Tungi foto rejimini yoqish sifatni ancha yaxshilaydi. Endi rasmlarda yetarli yorugʻlik va detallar bor. Bemalol, ularni ijtimoiy tarmoqqa joylasa boʻladi. Mana bu ikkita rasm Honor 50 va iPhone 13 Pro Maxda kechki payt olingan. Honor 50dagi rasm sifati ancha yaxshi, bir koʻrganda iPhone bilan bir xildek. Lekin, iPhoneda detallar baribir yaxshiroq koʻrinadi.

Honor 50

iPhone 13 Pro Max

Portret rejimi kamerada yaxshi ishlaydi. Lekin, baʼzida orqa fonni xiralashtirishda xatolar boʻlib qoladi. Buni rasmni yaqinlashtirib sochlarning xiralashgan qismida koʻrishingiz mumkin.

Old kamera sifati jihatidan muammo uchratmadim. Bu borada iPhone bilan solishtirganda yomonroq natija berdi deb aytolmayman. Lekin, Samsung Galaxy S21 Ultra old kamerasi haqiqatdan ham ancha sifatli ekanligi koʻrinib qoldi.

Videolar borasida ham sifat yaxshi, smartfon bemalol 4K formatida videoga oladi. Bu yerda boshqa biror bir smartfonda yoʻq yangilik qilingan, Multi video rejimi qoʻshilgan. Bu rejimda ham old, ham orqa kamera birdan ishlaydi va old kamerada sizni ham koʻrsatib turadi. Instagram yoki Tik-tokda tez-tez online efir qiladiganlarga bu juda qiziq.

Multivideo rejim. Old kamerani kichraytira ham bo'ladi.

Protsessor:

Protsessor masalasida menga eng muhimi smartfonning qotib qolmasligidir. 20 kundan ortiq foydalanish davrida smartfon biror marta qotmadi. Lekin, smartfonda bugungi kundagi eng kuchli 8-avlod Snapdragon protsessori emas, aksincha 778G yaʼni yettinchi avlod protsessori qoʻllangan. Bu smartfonning qudrati nazariyada Snapdragon 888 protsessorida ishlaydigan smartfonlardan ancha kuchsizligini anglatadi. Amalda, smartfon 20 kunda bir marta ham qotmadi va doimiy stabil tez ishladi. Umuman oʻyin oʻynamasam-da, oʻyinda qotmasmikin deb Fortnite oʻyinini oʻrnatib koʻrdim. 30-40 minutlik test vaqtida oʻyin bilan hech qanaqa muammo boʻlmadi.

Zaryadi:

Smartfonda 4300 MaH akkumulyator oʻrnatilgan. Solishtirish uchun Samsung Galaxy S21 Ultrada 5000 MaH akkumulyator oʻrnatilgan. Bu kichik boʻlib tuyulishi mumkin. Lekin, amalda ishlatishda oʻrtacha smartfondan yirik farq koʻrmadim. Standart ishlatishda smartfon bir kunga bemalol ishlab beradi. Lekin, oʻyin oʻynalsa yoki ekran doimiy oʻchmasa akkumulyator kun oxirigacha turib bermasligi mumkin.

Lekin, smartfondagi men uchun eng yoqimli va asosiy syurpriz 66W quvvatlagichi boʻldi. Bu haqiqatdan ham juda foydali, telefon juda tez quvvat oladi. 80 foiz uchun 20-22 daqiqa zaryadga qoʻyish yetarli. iPhone foydalanuvchilariga, shu jumladan oʻzimga salomlar)) Umumiy 100 foiz quvvatga yetib borish Honor 50da 40-45 daqiqacha vaqt oladi va bu juda qulay. Shoshib turgan holatda ozgina zaryad bilan bir necha 10 foiz toʻplab olish mumkin.

Honor 50 smartfoni Asaxiy Uz orqali 19 noyabrdan boshlab sotuvga chiqdi. Hozirda smartfon olayotgan har bir kishiga Honor Band 6 smart brasleti sovgʻa qilinmoqda. Telefonning sotuv narxi 6 GB operativ xotira bilan 4 890 000 Soʻm, 8 GB operativ xotira bilan 5 399 000 Soʻm.

Xulosa qilganda.

Ustunliklari:

- Ajoyib dizayn

- Sifatli ekran

- Kamerada foydali tungi foto rejimi

- Toʻgʻridan-toʻgʻri efirlar uchun Multi Video funksiyasi

- 20-22 daqiqada 80 foiz quvvatlaydigan 66W quvvatlagichi

Kamchiliklari:

- Yorugʻlik past joyda kamera sifati sezilarli pasayadi.

- Kamerada portret rejimda baʼzi xatoliklar bor.

- Smartfonda eng kuchli Snapdragon 888 emas, kuchsizroq 778G protsessori oʻrnatilgan.

- Smartfon komplektida chexol yoʻq va sotuvda ham hali koʻrmadim

Honor 50 yaxshi narxga ega boʻlgan sifatli smartfondir. Uni men test davomida asosan iPhone 13 Pro Max va Samsung Galaxy S21 Ultra bilan solishtirdim. Garchi premium kategoriya smartfon boʻlmasa-da, Honor 50 shubhasiz oʻz narx kategoriyasida eng yaxshi smartfondir. Unga eng yaqin Samsung Galaxy A72 kabi smartfonlarda baribir bunga nisbatan kamchiliklar bor.

Agar sizga smartfonning brendi muhim emas, muhimi chiroyli smartfon qotmasdan ishlasin, kamera ham sifatli boʻlsin desangiz qoʻrqmasdan Honor 50ni tavsiya qilaman.

Smartfonni rasmiy kafolat bilan Asaxiy Uz orqali xarid qilishingiz mumkin: https://u.to/Sr-VGw

Firuz Allayev