Рахшона Аҳмедова: Соябон остида

Қўлингиздаги қиссалар ва ҳикоялар тўплами ёш адиба Рахшона Аҳмедованинг иккинчи насрий китоби. Мазкур тўпламга жамланган ҳикоя ва қиссаларда адибанинг жаҳонгашталиги, кўп юртлар ва одамларни ўргангани, кузатгани билинади. Япон, корейс, хитой халқининг характери, дунёқараши ва ҳаётга муносабатини ўша заминда кўриб, ҳис этиб, юрагидан ўтказиб, кейин ёзгани бир неча ҳикояларида яққол сезилади. Осиё халқларининг гўзал, аммо ўта мураккаб оламини очишда ёзувчи улар билан бақамти яшагани, ҳамдам, ҳамқадам бўлганини "Айи", "Мени кечир, Кумико!", "Юкионинг танлови" каби ҳикоялари сўзлаб беради.

Адабиётда энг фусункор, ўта талабчан, инжиқ жанр бўлмиш реализмда қоғоз қоралаш кўпчиликка жўн юмушдек туюлар, Бироқ унинг тилини тушунган, жанр талабларини тўғри англагангина нимадир ёзиши мумкин. Рахшона Ахмедованинг қўлингиздаги китобда жам ҳикоя ва қиссаларида реализмнинг жўн ва бениҳоя жозибадор дунёси яширин. Сизга ўша олам кенгликларида баҳузур сайр этиш насиб этсин!