Наргиза Асадова: Қушлар Саловати

Кўзмунчоқ! Тилимизда шундай самимий сўз бор. Ота-боболаримизнинг кўзга яқин, келишган фарзанд-у набираларига қарата айтиладиган “Кўз тегмасин” иборасини кўп эшитганмиз. Эҳтимол, шу сўздан илҳомланиб Ўзбекистон халқ шоири Сирожиддин Саййид ҳам китобларидан бирини “Сўзмунчоқ” деб номлагандир.

Адабиётимизда ҳам ана шундай ўсиб келаётган кўркам ниҳолларнинг боғга айлангулик бўйи бор. Бу боғларнинг ҳосили мўл бўлишини ният қилиб, бир туркум китобларни “Сўзмунчоқ” рукни остида нашр этишни режа қилдик.

Дунёда кўнгилга қайтмоқдан ёруғ юмуш борми? Бу шошқин, тошқин, аразли-ю ишвали ҳаётда таскин – шеър бўлса, бу асли ўша нурли юмушнинг пойқадамидандир.

Шоира Наргиза Асадованинг ушбу китобида тизилмиш шеърлар билан дилдаги азим дардларга инжа таскин топсангиз, шоиранинг кулгулари, кўзёшидек рост туйғуларига ошнолигингиз шундандир...