Тиббий атамалар изоҳли луғати

«Тиббий атамалар изоҳли луғати» ҳозирги замон тиббиётида қўлланиладиган 10 000 атрофидаги клиник атамалар ва тиббий тушунчаларни ўз ичига олган. У умумий амалиёт шифокорлари, фармацевтлар, таржимонлар, тиббиёт муассасалари ходимлари ҳамда тиббиёт институтлари талабалари ва коллежлари ўқитувчилари учун атамалар моҳиятини русча ва лотин ёзувига асосланган янги ўзбек алифбосида ўзлаштиришда бебаҳо ёрдам кўрсатади.

Луғатда асосий клиник атамалар ва тиббий тушунчалар билан бир қаторда анатомия, физиология, хирургия, тиббий психология, психотерапия, стоматология, биокимё, фармакология, психиатрия, эпидемиология, ҳамширалик иши ҳамда соғлиқни сақлаш муассасалари ва бошқа жабҳаларда кенг қўлланиладиган янги атамалар ҳам ўрин олган.

Луғатдаги русча - байналмилал клиник атамаларнинг изоҳи ўзбекча - кирилл ва лотин ёзувига асосланган янги ўзбек алифбосида берилган бўлиб, у барча шифокорлар, бакалаврлар, магистрлар, ўқитувчи ва талабаларга қулайлик туғдиради.

Тақдим этилаётган луғатнинг анатомияга оид атамалари 2009 йилда нашр қилинган «Тиббий атамалар энциклопедик луғати»га асосланган ҳолда тайёрланган. Ўйлаймизки, ушбу ноёб луғат орқали нафақат тиббиёт ходимлари, балки тиббиётга қизиққан кенг омма ҳам яқин маслаҳатгўй ва фойдали китобга эга бўлади.