Султон Раев: Танланган асарлар

Куни кеча атоқли ёзувчи, давлат ва жамоат, маданият арбоби, моҳир дипломат Султон Раевнинг ўзбек тилидаги “Танланган асарлар”и чоп этилди.
   Китобдан етти ҳикоя, бир қисса ва бир роман, олти саҳна асари ва Чингиз Айтматов ҳақидаги эссе ўрин олган. Таржимонлар – Аҳмаджон Мелибоев, Зуҳриддин Исомиддинов, Жаббор Эшонқул, Ҳилола Абдусаломова, Маҳбуба Темирова, Эркин Бойназаров, Абдуғани Абдуғафуров, Дилфуза Қаршибоева.
   Китобга таниқли ёзувчи Хайриддин Султон сўзбоши ёзган. Хусусан, унда шундай сўзлар бор:
    “Султон Раевнинг довруғи Олатоғнинг баланд чўққиларидан аллақачон ошиб кетган... Султон Раев бугунги кунда жаҳон миқёсида кўзга кўринган адиб, таниқли дипломат бўлиб майдонга чиқди. Унинг ғоявий-бадиий жиҳатдан етук ўнлаб китоблари дунёнинг турли мамлакатларида нашр қилинаётгани, инглиз, франсуз, рус, венгер, хитой, украин, турк, қозоқ, озарбайжон, ўзбек, татар ва бошқа тилларга ўгирилиб, халқаро маданий доираларда кенг эътироф этилаётганини барчамиз туркий адабиётимизнинг катта ютуғи деб қабул қиламиз”.
   Ўзбекистон Ёзувчилар уюшмаси ҳомийлигида чоп этилган китобни ўқишни тавсия қиламиз.