Шайх Муҳаммад Содиқ Муҳаммад Юсуф: Соғлом бола

Фарзанд неъмати Aллоҳ таолонинг бандаларига берадиган сон-саноқсиз неъматлари ичида енг улуғ неъматлардан биридир. Бу неъматнинг улуғлигини, уни Aллоҳ таолодан бошқа зот бера олмаслигини тўлиқ англаб етиш учун бефарзандларнинг ҳолига назар солиш керак. Aна шунда инсон фарзанд неъмати қанчалар улуғ неъмат эканини тушунади. Катта-кичик ҳар бир неъмат етганда неъмат берувчига шукрона келтириш инсоннинг соф табиатида мувжуд ҳақиқатдир. Шукр эса икки қисмдан иборат:
Биринчиси – маънавий шукр бўлиб, неъмат берувчининг шаънига мақтов сўзларини айтишдир.
Иккинчиси – амалий шукр бўлиб, неъматни неъмат берувчини рози қиладиган тарзда тасарруф этишдир.
Фарзанд неъматига маънавий шукр қилиш уни берган Aллоҳ таолога ҳамд ва шукр сўзларини тил билан айтиб, дил билан тасдиқлашдан иборатдир.
Фарзанд неъматига амалий шукр қилиш ўша фарзандни уни берган Aллоҳ таолога иймон келтирадиган, ибодат қиладиган солиҳ банда қилиб ўстиришдан иборатдир. Бунинг учун эса энг аввал Исломда ота-онанинг фарзанд олдидаги бурчларига айлантирилган амалларни ихлос билан бажариш керак. Ота-онанинг фарзанд олдидаги бурчларидан бири уни соғлом қилиб вояга етказишдир.