Қудратилла Рафиқов: Миллатпарвар

Ушбу китобдан сиёсатшунос Қудратилла Рафиқовнинг янгиланаётган Ўзбекистон сийратига чизгилари - Президент Шавкат Мирзиёев раҳбарлигида мамлакатимизда амалга оширилаётган ҳаётбахш ислоҳотлар ҳақида чуқур таҳлил асосида битилган публицистик мақолалари ўрин олган.
Муаллифнинг равон ва содда тилда ифода этилган фикрларидан ўқувчи ўзига катта таассурот олади, билим ва дунёгараши кенгаяди.
Тарихдан маълумки, Ипак йўлининг қоқ марказида жойлашган мамлакатимиз азалдан мултикултурализм - турли маданиятлар, дин ва тамаддунлар ўчоғи кесишган ҳудуд ҳисобланган. Бу ерда қадимдан яшаб келаётган халқлар тарих давомида бир-бирини ҳар томонлама қўллаган, бир-бирини тўлдириб келган. Бугун ҳам она Ватанимиз нафақат ўзбекларга, балки ўнлаб бошқа халқларга ҳам азиз макондир.
Китобни ўқиган одам беихтиёр шуни англайдики, Янги Ўзбекистон тарихини ирқи, дини, тили, маданияти ва қадриятларидан қатъи назар бир мақсад йўлида барча ўзбекистонликлар - кўп миллатли халқимиз бир мушт бўлиб, бирикиб, яхлит миллат ва халқ сифатида бирга яратмоқда. Шундай экан, унинг шонли, ёрқин бўёқларга бой бўлишига ҳар биримиз дахлдормиз. Албатта, бунинг учун инсонда буюк туйғу - ватанпарварлик бўлиши керак.
Кенг ўқувчилар оммасига мўлжалланган мазкур тўплам ана шундай ҳаётбахш туйғулар уйғотишига ишонамиз.