Олим Тошбоев: Фитрат

 Атоқли маърифатпарвар, қомусий олим Абдурауф Фитрат миллий тарихимиздаги энг ёрқин сиймолардан биридир. Бу  улуғ зот ХХ аср аввалида жамият ҳаётида юз берган муҳим ўзгаришларда ғоявий устоз вазифасини бажарган бўлса-да, унинг ибратли ҳаёти ва фаолияти ҳақида ҳалигача йирик бадиий асар мавжуд эмас эди. 

     Ўқувчи мутолаа асносида “бойлиги ўзига буюрмаган халқ” фожиасининг туб сабаблари ҳақида ўйга толади. Асли журъат, ғайрат ва шиддатга замин яратиши лозим бўлган “Яратганга таваккал” ғоясини туркистонликлар сустлиги, танбаллиги, ишбилмаслиги, нодонлиги учун бамисоли “қалқон”га айлантириб олганига, Фитрат ва салафларининг илк қадамларданоқ соясига айланган, содиқ дўст қиёфасидаги манфур кимсалар охирги дамларда ҳам ўлмай яшаётганига амин бўлади..