Иқбол Қўшшаева: Заминга сиғмаган орзулар

Ушбу тўпламда Баҳодир Йўлдошев, Римма Аҳмедова, Дилором Каримова, Мурод Муҳаммад Дўст каби миллатимиз ойдинлари билан суҳбатлар, санъат ва адабиёт ҳақидаги мақолалар, эсселарга кенг ўрин берилган. Китобни қисқагина қилиб “уйғунлик жозибаси” деб таърифлаш мумкин.

 Нега бизда ланжлик ҳукм суряпти? Шоир тараннум этгандек, чиндан ҳам ердаги жаннатда яшаяпмизми? Бали, биз ўзимизни кўп нарсадан, ҳатто ҳақиқатни кўришдан (айтиш демаяпман) ҳам иҳоталаб ташлагандирмиз. Дард миқёси тор бўлгани учун бадиий ва экран асарларида юракнинг зарби сустмикан? Ўзимиз танлаган илмлилик, “олтин ўрталик” деб атаганимиз сихни ҳам,  кабобни ҳам куйдирмаслик истаги ўз-ўзидан матнга экранга кўчяпти. Афсуски, биз бугун “шахс” деб улуғлаётган зиёлиларни жадидларнинг қисмати ва жасоратидан кўра уларга ўрнатилган ҳайкал кўпроқ ҳаяжонлантиради.