Алишер Навоий: Оразин ёпқач кўзумдин

Алишер Навоий мумтоз шеъриятимизнинг деярли барча жанрларида баракали ижод қилган. Ўз асарларида умумбашарий ғояларни ҳаётнинг мазмуни, инсоннинг тақдири, пок ахлоқ ва самимий муҳаббат, чинакам дўстлик, ватанпарварлик туйғуларини гўзал ифодалаган. Шу боис Навоий асарлари ҳар қандай давр учун, ҳар бир авлод учун ўз аҳамиятини йўқотмасдан келади.

Ўзбек адабий тилининг бор гўзаллиги, нафосати, бадиияти, сеҳрини ҳам биз айнан Алишер Навоий ижодий меросини ўрганиш орқали англаймиз, ҳис этамиз.

Азиз китобхон! Эътиборингизга ҳавола этилаётган мазкур тўпламга ҳам барчангиз билган, барчангиз севган, барчангизга ёд бўлиб улгурган Навоий ижод гулшанининг энг сара намуналарини жамладик, айрим сўзларнинг изоҳини ҳам келтирдик. Умид қиламизки, китоб мутолаасидан ўзгача бир завқ туясиз, Навоийнинг руҳий олами билан қайта юзлашасиз.