Абдулкарим Ҳасан: Ucell билан 22 йил (3 тилда)

Рисолада келтирилган барча воқеликлар ҳаётда бўлиб ўтган, баъзиларини ўз кўзим билан кўрган бўлсам, баъзиларини кўп марта эшитганман. Ушбу рисолани ёзишда йўл қўйилган барча камчилик ва хатоларни, бирор жумлада фикрни ўқувчига керакли маънода етказиб беролмаган бўлсам, каминанинг камчилиги деб билишингизни истардим.

Ўтган воқеаларни қаламга олиш билан янги ходимларга компаниямизнинг босиб ўтган ривожланиш йўлини кўрсатиб, ундан тўғри хулоса чиқариб, биз қилган хато ва камчиликларга йўл қўймасликларига сабаб бўлади деган умиддаман. Кўнгилдаги ўй-фикрларни оғзаки айтгандан кўра бирор китоб холатида етказиш ўқувчининг тафаккур қилиши учун яхши имконият яратади деб ўйлайман. Албатта, мен ўзимни мукаммал ва хато қилмайдиган мутахассис демоқчи эмасман, балки янги ходимлар ўтган воқеаларни ўқиб, бизнинг хато ва 

камчиликлардан ибрат олиб, келажакда тўғри қарорлар қабул қилишсин деган ниятим бор.

Табиийки, ҳозирги ҳолатга компания етиб келишида бу ерда ишлаб кетган ва ишлаб келаётган кўпгина ходимларнинг улкан меҳнати ётибди. Компаниянинг доимо ривожланиш ва юксалиш йўлида ушлаб туриш, албатта, ўз-ўзидан бўлмайди. Бунинг замирида компания ва ходимларнинг ҳар хил синовларга учраши, ҳаётдаги паст-баланд йўлларни ва қийинчиликларн енгиб ўтганликлари ётибди. Иш фаолиятимда компания учун кўп йиллардан бери ўзларининг меҳнатларини аямай келаётган ходимларни кўп кўрдим. Гўёки компания уларнинг иккинчи уйидек. Компаниянинг ривожланиб, гуллаб-яшнаши шундай ходимларни чин маънода шод этади.

Бу рисолани ёзиш билан бирор бир инсонни камситиш ниятим йўқ. Шунинг учун яна бир бор кимнидир эсдан чиқариб, қилган хизматларини эътироф эта олмаган бўлсам, узр сўрайман.