Абдурашид Нурмуродов: Ўлим кўз ёш тўкканда

Иккинчи жаҳон урушида фашизмга қарши курашиб ҳалок бўлганларнинг, мамлакатимиз озодлиги ва мустақиллиги учун жон берган Ўзбекистоннинг барча ўғлонлари хотирасини yod etib “Zabarjad Media”дан навбатдаги шедевр асарни кутиб олинг

Иккинчи жаҳон урушида ўн миллионлаб одамлар ҳалок бўлди. Мулоқотда бу миллионлар залворини сезмайсиз. Агар улар бир жойга тўпланса-чи? Унда бунча одамни жойлаштириш учун ўнлаб шаҳарлар керак бўлади.

Фашист жаллодлари Совет Иттифоқини худди Европа давлатларини ишғол қилгандай осонгина босиб оламиз деб ўйлаганди. Улар кутгандай бўлмади. Халқ бир муштга айланди. Бундан талвасага тушган фашистлар аламини бегуноҳ халқдан олдилар: уларни ўлим лагерларида газ билан бўғиб ўлдирдилар, крематорияларда ёндирдилар.

Ёвуз жаллодлар хотинларининг ёвузлиги эрлариникидан ҳам ваҳшийроқ эди. Улар маҳбуслар терисидан совун қилиб ювинишди, сумка қилиб кўтаришди, қўлқоп қилиб кийишди. Ўлдирилган маҳбуслар сочидан пар кўрпалар қилиб ётишди. Одамнинг куймай қолган суякларини майдалашиб, ўғит қилиб ишлатишди.

Дунё тарихида бундай ёвузлик, бундай уруш бўлмаган. Бу уруш биринчиси ва сўнггисидир.

Ана шу ваҳшийларга қарши одамларимиз бир одамга айланишиб жанг қилди ва катта йўқотишлар билан бўлса-да, ғалаба қозонишди. Ана шу буюк ғалабага етишгунча миллионлаб одамларимиз ҳалок бўлдилар.