Эфраим Севела: Тўхтатинг самолётни, тушиб қоламан

Эфраим Севела – собиқ шўро ёзувчиси, лекин умрининг сўнгги йиллари Америка Қўшма Штатларида ва Исроилда кечган. Қўлингиздаги қисса совет тузумининг сўнгги йилларида ёзилган бўлиб, унда юксак маҳорат билан бу тузумнинг турли-туман нуқсонлари очиб берилган.

Қисса жиддий масалаларга бағишланган бўлса-да, ҳазил-мутойибага, юморга, киноя ва пичингларга жуда бой. Қисқача айтганда ҳам куласиз, ҳам йиғлагудек бўласиз. «Гап келганда отангни ҳам аяма» деганларидек, муаллиф қиссанинг бирон ўрнида сохта пафосга берилмайди, қуруқ ва пуч тасвирдан, баландпарвоз гаплардан қочади. Бу эса қиссага ўзига хос ранг ва жозиба бағишлайди ва мароқли (бир текисда равон ва тез) ўқилади.

Замонавий сўзлашувда, мантиқсиз, кулгули ва ноодатий вазиятларда қўлланиладиган «Тўхтатинг самолётни, тушиб қоламан» иборасининг келиб чиқиши, мана шу асар номига тақалса не ажаб.